Benzini "klik" səsindən sonra doldurmayın - XƏBƏRDARLIQ

Bir çox sürücü yanacaq buxarlarının nəzarətdə saxlanması üçün quraşdırılan EVAP sisteminin mövcudluğundan və onun necə işlədiyindən xəbərsizdir. Hansı ki, düzgün istifadə edilmədikdə həm təbiətə zərər vurur, həm də avtomobildə ciddi nasazlıqlara yol aça bilər.

EVAP (Evaporative Emission Control System) avtomobilin yanacaq sistemində yaranan benzin buxarlarını atmosferə buraxmadan tutaraq onları yenidən mühərrikə qaytaran sistemdir. Benzin təkcə maye formasında deyil, istidə buxarlanaraq qaz halına da keçir. Əgər bu buxarlar sərbəst buraxılsa, havanı çirkləndirər və həm də yanacaq itkisinə səbəb olar.

EVAP sistemi bu buxarları xüsusi "charcoal canister" (kömür filtri) adlı qurğuda toplayır və lazım olduqda bu buxarı mühərrikə ötürərək yanma prosesində istifadə olunmasını təmin edir. Beləliklə həm təmiz mühit təmin olunur, həm də yanacaq israfı azaldılır.

Benzin çənini tam doldurmaq niyə zərərlidir?

Bir çox sürücü tapança klik etdikdən sonra çəni tam "ağzınacan" doldurmaq vərdişinə malikdir. Bu isə EVAP sisteminin işini pozur. Çünki benzin çəni heç vaxt tam doldurulmaq üçün nəzərdə tutulmayıb - təqribən 5-10% boş yer qalmalıdır. Bu boşluq "buxar yastığı" rolunu oynayır və istilikdə genişlənən benzin və buxarlar üçün təhlükəsiz sahə yaradır.

Əgər çən tam doludursa:

• Genişlənən benzin kömür filtrinə dolaraq onu zədələyə bilər,
• EVAP klapanları sıradan çıxa bilər,
• Sistemdə təzyiq artar və bu, "Check Engine" lampasının yanmasına səbəb ola bilər,
• Avtomobildə benzin iyi yayılmağa başlaya bilər.

Avtomobilin EVAP sistemi həm ətraf mühitin qorunması, həm də texniki sağlamlıq baxımından mühüm rol oynayır. Bu sistemin düzgün işləməsi üçün sürücü sadə bir qaydaya əməl etməlidir: tapança klik etdikdən sonra benzin doldurmaqdan imtina etmək. Bu həm yanacaq sistemini, həm filtrləri qoruyacaq, həm də sizi əlavə təmir xərclərindən yayındıracaq.

İslam
Milli.Az