Ağ Ev Trampın əlindəki göyərmələrin səbəbini açıqladı - FOTO

İsveçrənin Davos şəhərində keçirilən Dünya İqtisadi Forumu (WEF) çərçivəsində "Sülh Şurası" sənədinin imzalanması zamanı Donald Trampın sol əlinin üstündəki tünd göyərmə izləri diqqət çəkib. Ağ Ev bu vəziyyətin tibbi səbəblərini və hadisənin necə baş verdiyini rəsmən izah edib.

Milli.Az xəbər verir ki, Ağ Evin mətbuat katibi Karolin Livitt (Karoline Leavitt) bildirib ki, Prezident Tramp Davosdakı tədbir zamanı əlini imza masasının kənarına vurub və nəticədə bu göyərmə yaranıb. Fotoşəkillər və videolar sübut edir ki, imza mərasiminin əvvəlində göyərmə yox idi, lakin masada əyləşdikdən təxminən 10 dəqiqə sonra izlər aşkar görünməyə başlayıb.

Ağ Ev rəsmiləri və prezidentin şəxsi həkimi Dr. Şon Barbabella Trampın əllərinin niyə bu qədər tez göyərdiyinə aydınlıq gətiriblər. Bunun əsas səbəbi prezidentin hər gün qəbul etdiyi aspirindir.

Tramp "Wall Street Journal"a müsahibəsində bildirib ki, o, həkimlərin tövsiyə etdiyindən daha yüksək dozada - gündə 325 milliqram aspirin qəbul edir.

Prezident aspirin qəbulunun qanı durulaşdırmaq üçün faydalı olduğunu iddia edir. Lakin tibbi olaraq, bu qədər yüksək doza aspirin qəbulu dərinin altında qansızmalara və ən kiçik zərbədən belə ağır göyərmələrə (hematoma) səbəb olur.

Trampın sağ əlindəki bənzər göyərmələr artıq uzun müddətdir ki, mətbuatın gündəmindədir. Prezidentin bu izləri bəzən ağır makiyaj və ya sarğılarla gizlətməyə çalışması onun ümumi sağlamlıq vəziyyəti ilə bağlı suallar doğurmuşdu. Lakin həkimlər bu vəziyyətin qocalma ilə birlikdə damarların həssaslaşması və aspirin terapiyasının yan təsiri olduğunu vurğulayırlar.

Mayo Klinikasına görə, infarkt və ya insultun qarşısını almaq üçün tövsiyə olunan standart "aşağı doza" aspirin miqdarı adətən 81 milliqramdır. Trampın istifadə etdiyi doza isə bundan təxminən dörd dəfə çoxdur.

Lalə Qüdrətova
Milli.Az