Dünya

İsveçdə son 18 ildə ilk dəfə casusluqla bağlı məhkəmə işinə start verilib

27 Avqust 2021 21:15

0 Şərh Baxış: 522

VTB-də minimal faiz dərəcəsi ilə nağd kredit 10.49%-dən

İsveçdə son 18 ildə ilk dəfə casusluqla bağlı məhkəmə işinə start verilib.

Milli.Az AZƏRTAC-a istinadən bildirir ki, casusluqda şübhəli bilinən Yöteborq şəhərinin adı çəkilməyən 47 yaşlı sakininin məhkəməsi başlayıb. O gizli xarakter daşıyan məlumatları digər ölkəyə ötürməkdə təqsirləndirilir.

Belə ki, İsveçin "Volvo" və "Scania" şirkətlərinə aid olan sənədləri əldə edən təqsirləndirilən şəxs 2019-cu ilin fevralında Stokholmun mərkəzindəki restoranlardan birində, bu məlumatları ötürmək istədiyi an həbs olunub.

İsveç təhlükəsizlik polisinin məlumatına görə, məlumatları əldə etmək istəyən şəxs, burada diplomatik iş adı altında fəaliyyət göstərən xarici kəşfiyyat məmuru olub. Görüş əsnasında gizli xarakter daşıyan məlumatları bu adama ötürəndən sonra hər iki şəxs polis tərəfindən saxlanılıb.

İstintaq nəticəsində, 47 yaşlı təqsirləndirilənin 2017-ci ilin yayından başlayaraq xarici ölkə maraqları uğrunda casusluq fəaliyyəti ilə məşğul olduğu da üzə çıxıb. O gizli məlumatları almaq üçün daha əvvəl Yöteborqdakı "Volvo Cars" və Södertälye şəhərindəki "Scania" şirkətində çalışıb. O aldığı tapşırığa əsasən, iş kompüterlərindən məxfi məlumatları şəxsi kompüterinə, sonra isə xarici kəşfiyyat işçisinə USB vasitəsilə ötürməli idi.

Beləliklə, təqsirləndirilən şəxs İsveçə qarşı casusluq və ya qanunsuz kəşfiyyat fəaliyyəti aparmaqda günahlandırılır. Əgər məhkəmə onun qanunsuz casusluq etdiyi qərarına gələrsə, ona 6 ilə qədər həbs cəzası kəsilə bilər. Məhkəmə cümə axşamı günü başlayıb və sentyabrın 1-də başa çatması nəzərdə tutulur.

Qeyd edək ki, bu, son 18 ildə İsveçdə casusluq ittihamı ilə aparılan ilk məhkəmə işidir.

Milli.Az