Santorini əvəzinə Serifos, Kapri əvəzinə Proçida: Avropada kəşf edilməyi gözləyən 5 ada

Turistlərlə dolu məşhur nöqtələr əvəzinə daha sakit sahilləri sevən səyyahlar üçün Avropada kəşf edilməyi gözləyən beş ada var. Bu adalar məşhur qonşularının kölgəsində qalsalar da, insana heyranedici mənzərələr, yerli həyatı yaxından tanımaq fürsəti və daha az insan izdihamı təqdim edirlər.

Milli.Az Euronews-un siyahısına görə Avropada kəşf olunmağa layiq ən yaxşı, lakin az tanınan adaları təqdim edir:

La Qomera (İspaniya)
Kanar adalarının ən kiçiyi olan La Qomera, məşhur Tenerife adasının tam yanında yerləşir. Tenerife ildə təxminən 5 milyon turist qəbul etdiyi halda, La Qomera kütləvi turizmdən uzaq qaldığı üçün çox daha az ziyarətçi görür. Bura macəra sevənlər üçün əsl cənnətdir. UNESCO-nun Dünya İrsi siyahısında olan Qaraqonay Milli Parkı Avropanın ən təsirli dumanlı meşələrinə ev sahibliyi edir. Qara qumlu çimərlikləri və hər addımda rast gəlinən kaktus çiçəkləri adanın fərqli gözəlliyidir.

Şolta (Xorvatiya)
Split şəhərinin qarşısında yerləşməsinə baxmayaraq, Şolta tez-tez Hvar və Braç kimi daha məşhur qonşularının kölgəsində qalır. Bura Xorvatiyanın ən asan və ən az kəşf edilmiş qaçış marşrutlarından biridir. Adada həyat daha yavaş axır. Sakit balıqçı kəndləri, kimsəsiz çınqıllı qoyları, zeytun və üzüm bağları Adriatik sahillərində getdikcə nadir rast gəlinən otantik atmosferi qoruyub saxlayır.

Serifos (Yunanıstan)
Serifos, Kiklad adalarının sevəcəyiniz bütün xüsusiyyətlərini təqdim edir, lakin Santorinidəki insan izdihamından uzaqdır. Afinadan bərə ilə təxminən iki saata çatmaq olar. Hava limanı və böyük kurort komplekslərinin olmaması sayəsində bura kütləvi turizmdən kənarda qalıb. Əvəzində sizi səssiz çimərliklər, ağ rəngli kəndlər və yavaş bir həyat tərzi qarşılayır.

Proçida (İtaliya)
Kapri adası lüks restoranları və bahalı otelləri ilə dünyaca məşhur olsa da, həm də çox yüksək qiymətləri ilə tanınır. Napoli körfəzində isə ondan heç də geri qalmayan, lakin daha münasib bir alternativ var: Proçida. Napolidən bərə ilə 40 dəqiqəyə çatmaq olar. Bura öz büllur kimi dənizi, rəngarəng evləri və İtalyan mətbəxinin ləzzətləri ilə Kaprini aratdırmır. Avtomobil sayının məhdud olduğu bu adada istirahət etmək həm daha rahat, həm də daha qənaətcildir.

Luinq (Şotlandiya)
Şotlandiyanın qərb sahillərindəki kiçik Luinq adası çox vaxt məşhur Skay adasının kölgəsində qalır, lakin adanın ən böyük cazibəsi də elə budur. Bura rəssamlar, sənətkarlar və cəmi bir neçə yüz nəfərlik kiçik bir icmanın yaşadığı yerdir. Təxminən 10 kilometr uzunluğunda olan adanın hər yerində kəşf ediləcək bir nöqtə var. Vəhşi təbiət həvəskarları üçün isə bura əsl xəzinədir: burada dəniz samurlarına, suitilərə, hətta şanslısınızsa, delfin və balinalara rast gələ bilərsiniz.

Müəllif: Ülkər Vəliyeva (Milli.Az redaktor)