Yeni Kaledoniya lideri Kristian Tein azadlığa buraxılır

Yeni Kaledoniya lideri Kristian Teinin işinə baxan üç hakim Fransada istintaq altında olan, bir ildir, istintaq təcridxanasında saxlanılan Kanak müstəqillik liderlərinin azadlığa buraxılmasına qərar verib.

Milli.Az xəbər verir ki, qərar Parisdə keçirilən məhkəmə prosesində verilib.

Uzun sürən istintaqın yekununda hakimlər dəlilləri əsas götürərək, Kanak və Sosialist Azadlıq Cəbhəsinin (FLNKS) prezidenti və Sahə Fəaliyyəti Koordinasiya Birliyinin (CCAT) rəhbəri Kristian Tein, digər fəallar Dimitri Qeneqey, Guillaume Vama və Ervan Waetheanenin həbsini davam etdirmək üçün heç bir səbəb olmadığına qərar verib.

Lakin prokurorlar qərarla razılaşmayıb, qərardan apellyasiya şikayəti verib.

Qeyd edək ki, Tein və digər fəalların azadlığa buraxılması üçün Bakı Təşəbbüs Qrupu (BTQ) hərtərəfli addımlar atılıb.

BTQ müxtəlif səviyyələrdə və platformalarda kanakların və Fransa müstəmləkəsi altında olan digər xalqların hüquqlarının müdafiəsi üçün tədbirlər təşkil edib, kanaklı məhbuslara, eləcə də onların ailələrinə hərtərəfli dəstək olub.

Bundan başqa, Bakı Təşəbbüs Qrupu kanakların mubarizəsinə hər cür yardım göstərib, onların haqq səsinin çatdırılması üçün müxtəlif yerlərdə aksiyalar təşkil edib.

Onu da əlavə edək ki, BTQ Fransanın təzyiqləri ilə üzləşmiş, Parisin müstəmləkə siyasətinin qurbanı olmuş xalqların və siyasi məhbusların məsələsini beynəlxalq təşkilatlarda müzakirəyə çıxarmağa nail olub, haqsız yerə həbs olunanların, o cümlədən Teinin azadlığa buraxılması üçün çoxsaylı aksiyalar keçirib.

Bu məsələ mütəmadi olaraq beynəlxalq təşkilatların gündəliyinə təklif olunub və salınıb. Kanaklı siyasi məhbusların hüquqlarının qorunması və azadlığa buraxılması istiqamətində beynəlxalq arenada, o cümlədən BMT strukturlarında davamlı iş aparılıb. /APA

Milli.Az