Dünya

Hindistanda bərə ilə qayıq toqquşdu - xeyli sayda ölən var

19 Dekabr 2024 08:51

Baxış: 446

#HİNDİSTAN

Çərşənbə günü Mumbai sahillərində sınaqdan keçirilən Hindistan Hərbi Dəniz Qüvvələrinə məxsus sürətli qayıq mühərrik nasazlığı nəticəsində sərnişin bərə qayığı ilə toqquşub və qəza nəticəsində 13 nəfər həyatını itirib.

Milli.Az xəbər verir ki, hadisənin dəqiq səbəbini müəyyən etmək üçün araşdırma başlanıb, lakin ilkin məlumata görə, mühərrikdə yaranan nasazlıq sürücünün qayığa nəzarəti itirməsinə və nəticədə toqquşmaya səbəb olub.

Rəsmilər hələlik sürətli qayığı iki Hərbi Dəniz Qüvvələri zabitindən biri, yoxsa gəmidə olan digər dörd nəfərdən birinin idarə etdiyini dəqiq bilmədiklərini bildiriblər. Bununla əlaqədar hadisəni araşdırmaq üçün xüsusi bir araşdırma komissiyası yaradılacaq.

Rəsmi açıqlamaya görə, "Hər hansı bir əsas komponent, məsələn, mühərrik, qayığa quraşdırıldıqda, biz istehsalçı (OEM) ilə birlikdə genişmiqyaslı sınaqlar aparırıq ki, kritik anlarda problemlər yaranmasın. Məsələn, istehsalçı mühərrikin 140 km/saat sürətə çata biləcəyini iddia edərsə, bunu istehsalçı ilə birlikdə sınaqdan keçiririk. Oxşar bir sınaq bu hadisə zamanı həyata keçirilirdi."

Yeni mühərrik quraşdırıldıqdan sonra altı nəfər - o cümlədən dörd OEM nümayəndəsi - sınaq keçirmək üçün qayığa mindi. Təxminən saat 16:00 radələrində qayıq sürücüsü nəzarəti itirərək Karanja yaxınlığında, Mumbai sahillərində sərnişin bərəsi Neel Kamal ilə toqquşub. Həmin vaxt bərə sərnişinləri Hindistanın Gateway of India limanından Elefanta adasına daşıyırdı.

Lalə Qüdrətova
Milli.Az