"Bu, qürurvericidir"

Xəbər verdiyimiz kimi, "Qarabağ"ın tarixində ən unudulmaz simalardan olan Aslan Kərimov rəsmən futbolla vidalaşır. Azerisport.az xəbər verir ki, 38 yaşlı müdafiəçi "Qarabağ"ın heyətində 346 oyuna çıxmaqla, böyük nailliyyət əldə edib. O, demək olar ki, "Qarabağ"ın heyətində bütün mümkün titullara sahib çıxıb.
 
"Qarabağ"ı 118 oyunda kapitan kimi meydana çıxaran Aslan burda 13 mövsüm keçirib. "Qarabağ"ın qazandığı bütün uğurlarda onun ismi var. "Qarabağ"ın qazandığı bütün titullarda (2 qat Azərbaycan çempionu, 3 qat ölkə kubokunun sahibi olub) heyətdə olub. Eyni zamanda Aslan hələ də millidə ən çox oynamış futbolçu statusunu özündə saxlayır.
 
Sabah isə Kərimov hazırda məşqçi kimi çalışdığı "Sumqayıt Şəhər"lə "Qarabağ" arasında baş tutacaq kubok oyununda futbolla rəsmən vidalaşacaq. Aslan Ağdam klubunun rəsmi saytına verdiyi açıqlamada bu barədə danışıb:
 
"Hər başlanğıcın bir sonu olur. Futbolçu həyatı əbədi deyil, bir gün karyerana son qoymaq lazım gəldiyini bilirsən. Düzdü, bəzən bunu qəbul etmək çətindir. Təbii ki, başqa klublarda da çıxış etmişəm, legioner kimi də  oynamışam, amma "Qarabağ" mənim üçün bir başqa olub. Hamı məni "Qarabağ"lı Aslan kimi tanıyır. Futbolla vidalaşmaq ağır olsa da, bununla barışmaq lazımdır. Geriyə boylandığım zaman heç bir şeyə görə peşman deyiləm. "Qarabağ" kimi tarixi bir rəmzin parçası olmaq qürurvericidir. İnşallah, gələcəkdə futbolçu kimi öyrəndiklərimi məşqçi kimi tətbiq etmək istəyirəm".
 
Aslan Kərimovun "Qarabağ"da...
 
...ilk oyunu:
28.02.1993. Qarabağ - Azəri - 2:0 (90 dəqiqə)
 
...son oyunu:
28.11.2010. Qarabağ - Neftçi - 0:1. (80-ci dəqiqədə meydana daxil olub)
 
...ilk qolu:
18.03.2003. Qaranağ - Şəmkir - 2:0 (39-cu dəqiqədə matçda ikinci qol)
 
...uğurları: Çempion (1993 ,1996/97), gümüş mükafatçı (1993/94), bürünc mükafatçı (2003/04, 2009/10, 2010/11), Kubokun qalibi (1993, 2005/06, 2008/09), finalçısı (1995/96)

Milli.Az