Cəmiyyət

Bakıda atasının təhqirlərinə dözməyən 19 yaşlı qız bıçağa əl atdı

20 İyul 2019 20:59
8 Şərh     Baxış: 4 130

Adam bıçaqlamaqda təqsirləndirilən 19 yaşlı Günel məhkəmə önündə törətdiyi cinayətə görə cavab verir. O, özgənin deyil, öz doğma atasının - 49 yaşlı İlham Hüseynovun qanını töküb. Özünün və şahidlərin dediyinə görə, əyyaş atasının onlara qarşı etdiyi zülmlərə dözməyib. Sərxoş ata tərəfindən dəfələrlə evdən qovulan gənc qız bəzən qohumlarına sığınıb, bəzən də məsciddə gecələyib. Hadisənin baş verdiyi gün isə anasının növbəti dəfə təhqir olunmasına, döyülməsinə göz yuma bilməyib və bıçağa əl atıb.

Bakı Ağır Cinayətlər Məhkəməsində atasını bıçaqlamaqda ittiham olunan Bakı şəhər sakini, 19 yaşlı Günel Hüseynovanın cinayət işi üzrə məhkəmə prosesi keçirilib.

Milli.Az virtualaz.org-a istinadən bildirir ki, hadisə bu il fevralın 20-də Sabunçu rayonu, Ramana qəsəbəsində baş verib. Gecə saat 1 radələrində içkili vəziyyətdə evdə dava salan, ailə üzvlərini söyüb təhqir edən İlham Hüseynov qızı tərəfindən susdurulub. Belə ki, sərxoş atanın hərəkətlərindən bezən gənc qız ona üç bıçaq zərbəsi endirib.

Törətdiyi cinayət əməlinə görə G.Hüseynovaya qarşı Cinayət Məcəlləsinin 126.1-ci (qəsdən sağlamlığa ağır zərər vurma) maddəsi ilə ittiham irəli sürülüb. Barəsində başqa yerə getməmək haqqında iltizam qətimkan tədbiri seçilib.

Təqsirləndirilən Günel Hüseynova ifadəsində ata-anası, bacısı ilə bir evdə yaşadıqlarını, atası İlham Hüseynovun spirtli içki aludəçisi olduğunu, heç yerdə işləmədiyini, sərxoş olan zaman səbəbsiz yerə mübahisə etdiyini, evdə dava-dalaş saldığını göstərib. Amma nə anası, nə də ki Günel onun barəsində hüquq-mühafizə orqanlarına şikayət etməyiblər. Evə qazanc gətirən də elə Günel olub. Ailənin yükü onun çiyinlərinə düşüb, bütün xərclərini özü qarşılayıb. Borca görə mənzilə gələn qaz xəttinin kəsilməsi isə ata-bala arasındakı münaqişəni daha da kəskinləşdirib:

"Evdə bircə mən işləyirdim, kommunal ödənişlərin pulunu çatdıra bilmirdim. Qazımızı kəsmişdilər, pulunu ödəyə bilmirdim. Atam həmin gün yenə sərxoş idi. Gecə saat 12-də anamla mübahisə etdi, küçə söyüşləri söyür, anamı tutub silkələyirdi. Özümdən asılı olmadı. Mətbəxdən götürdüyüm bıçaqla atamın kürəyinə, sinəsinə bir neçə dəfə vurdum. Neçə zərbə vurmağımı xatırlamıram. Atamı öldürmək niyyətim olmayıb. Törətdiyim əməldən peşmanam".

Zərərçəkmiş İlham Hüseynov ifadəsində spirtli içki qəbul edəndə özündə olmadığını, sərxoş olarkən qızları və arvadı ilə mübahisə etdiyini, ailədə söz-söhbət yaratdığını etiraf edib: "Hadisə baş verən gün də sərxoş olmuşam. Nə dediyimi, nəyə görə mübahisə etdiyimi xatırlamıram. Yalnız xəstəxanada ayılanda qızımın məni bıçaqladığını öyrənmişəm".

Şahid qismində dindirilən Kəmalə Hüseynova ifadəsində həyat yoldaşı İlhamın uzun illərdir spirtli içki aludəçisi olduğunu, işləmədiyini, evə çörəkpulu gətirənin yalnız böyük qızı Günel olduğunu göstərib. K.Hüseynovanın ifadəsinə görə, əri hər gün içib, evdə dava-dalaş salıb. Bir neçə dəfə qızını evdən qovub: "Təkcə Günel işləyirdi deyə kommunal xərcləri də çatdıra bilmirdi. Hadisə baş verən gün İlham yenə dava saldı. Məni söydü, evi yandıracağını dedi. Ağladım, yalvardım, dedim ki, nə olar, belə eləmə, mənə fikir vermədi. Əksinə, yaxamdan tutub silkələməyə başladı. Bizi ayırmağa çalışan Güneli kənara itələdi. Birdən İlham qəflətən dayandı. Bu vaxt onun bədənindən qan axdığını gördüm, yarasına pambıq qoydum. Təcili yardıma zəng vurdum".

Məhkəmə prosesi davam edir.

Milli.Az

loading...

Şərh yaz:

8 Şərh:

  • Anonim
    Bb · 20 İyul 21:08110

    Yazıq qız Allah mehkemeye insaf versin Aileni dolandıra bilmeyecek ve geleceyi de........

    Cavab yaz
  • Anonim
    Sinir · 20 İyul 21:1972

    Kiminle geldi aile qururlar, ve sonrada ezabin cekirler. Ailenin bunovresi salam olmalidi. Bele yaramaz adamlar ise umumiyetle evlenmeseler yaxwidi.

    Cavab yaz
  • Anonim
    Melek b · 20 İyul 22:11100

    Yaziq qiz.ananin isini ozu gordu.ana vaxtinda ayrilsa idi bele olmazdi.

    Cavab yaz
    • Anonim
      F.S.D. · 21 İyul 16:0400

      Salam Mələyim, qız həqiqətındə yazıq oldu(( ana boşanmaq, ərini küçələrdə ölməsinə razı olmayıb, Uşağının atasıdır deyə(( kaş məhkəmə Günelə iş kəsməyəydi, atası şikayət etməz . Yazıq qız ((

      Cavab yaz
  • Anonim
    Süleyman · 20 İyul 23:2970

    Eh! Azərbaycanda artıq kişilik və atalıq hisslərini itirən o qədər xarici görünüşdən kişiyə oxşayan məxluqlar var!

    Cavab yaz
  • Anonim
    vetensiz · 21 İyul 00:0370

    Yaziq qiz oz heyatini mehv etdi Allah o cur atani hec bir usaga vermesin

    Cavab yaz
  • Anonim
    QQ · 21 İyul 18:4110

    Bu bir ailə faciəsidir.Gənc bir qızın faciəsidir.O yazıq qızın tay - tuşları oxuyub ali təhsil alırlar ,qapılarlna elçi gəlir.Bu qız işləyib ailə saxlayır ,ev qaygısı çəkiir.Onun arzularlnı isə nəzərə alan yoxdur.Hələ üstəlik ata da öz üzərinə düşən atalıq ,ailə başçısı vəzifəsini yerinə yetirməməsi bir yana hələ bir evdə dava - dalaş da salması yazıq qızı axırda cinayət törətməyə vadar elədi .Adam bu taleni öz üzərində düşünındə o yazıq qızın faciəsini ,əzablarını anlayır .

    Cavab yaz
  • Anonim
    günahkar bəndə · 22 İyul 11:5400

    ALLAH BİZLƏRİ ALLAHİ QƏZƏBLƏNDİRƏN İŞLƏRDƏN UZAQ ELƏSİN AMİN ALLAH O QİZİN DA KÖMƏYİ OLSUN AMİN

    Cavab yaz

XƏBƏR LENTİ

Copyright © 2015 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.