Yeni binaların qaz dərdi

Yeni inşa olunan çoxmərtəbəli binalar Bakının simasını dəyişməklə, əhalinin mənzilə olan tələbatını ödəməklə yanaşı bir sıra problemlər də yaradır. Şirkətlər inşaat işlərinin gedişi zamanı sakinlərin bütün kommunal xidmətlərlə təmin olunacaqlarını bildirsələr də, sonradan vədlərinə əməl etmirlər.

Tikinti şirkətləri mənzillərin qazla təmin edilməsində niyə maraqlı deyil?

Tikinti şirkətləri mənzilləri əvvəlcədən satdıqlarından bu mənzillərin qazla təmin olunub-olunmamasında maraqlı olmurlar. Bunda maraqlı olan vətəndaşlardır ki, onlar da şikayətlə tikinti şirkətinə deyil, müvafiq dövlət qurumlarına müraciət edirlər. Dövlət orqanı isə bu halda problemin həllində aciz duruma düşür.

Hazırda Bakıda elə binalar var ki, onlarda 3 ildir məskunlaşma gedib, amma qazın nə vaxt veriləcəyi hələ də sual altındadır. Sakinlər ya binanı inşa etmiş şirkətin sahiblərini tapa bilmirlər, ya da MTK rəhbərləri binaya, mənzilə qaz xəttinin çəkilməsi üçün sakinlərdən əlavə pul tələb edirlər.

Sakinləri düşündürən isə odur ki, yaşadığı binaya qaz nə vaxt veriləcək və mənzillərə qaz xəttini kim çəkməlidir?

AzəriQaz: "MTK rəhbərləri camaatı aldadır"

Dövlət Neft Şirkətinin "Azəriqaz" İstehsalat Birliyinin Qaz təsərrüfatı istismarı şöbəsinin müdiri Vaqif Namazov Milli.Az xəbər portalına açıqlamasında bildirdi ki, yeni tikilən binalar aidiyyəti rayon icra hakimiyyətinin xüsusi komissiyası tərəfindən istismara qəbul edildikdən sonra akt tərtib olunur. Yalnız bundan sonra bina "AzəriQaz"ın balansına keçir və təbii qazla təmin olunur. Lakin binaların əksəriyyəti komissiya tərəfindən qəbul edilməyib. Bu səbəbdən həmin binalara qaz verilmir.

Binalara və mənzillərə qaz çəkilməsi üçün vətəndaşlardan pul yığılması məsələsinə münasibət bildirən şöbə müdiri deyir ki, lahiyəyə uyğun olaraq bütün qaz xətləri, sifarişçi tərəfindən çəkilməlidir. Həmin sifarişçi isə MTK rəhbərliyidir. Onların sifarişinə əsasən lahiyə-smeta sənədləri hazırlanır və bundan sonra qaz, kanalizasiya və su xətti çəkilir. Bütün bunların hər biri MTK sədri tərəfindən həyata keçrilməlidir.

"MTK rəhbərləri camaatı aldadır. Tikinti şirkətinin rəhbərləri müştəri ilə bağladığı müqavilədə bütün kommunal xətlərin çəkilməsini öz üzərinə götürür. Buna görə də, mənzilə qaz xəttini tikinti şirkətinin özü çəkməlidir", - deyə şöbə müdiri vurğuladı.

Bir məsələni əlavə edək ki, hazırda qazsız mənzillərdə yaşayanlar ən azı binaların Dövlət Qəbul Komissiyasına təhvil verilməsinə qədər gözləməli olacaqlar.

Anar Məmmədov
Milli.Az