Maraqlı

Elektrikə ehtiyac duymayan soyuducu icad etdi: Tərəvəzləri həftələrlə təzə saxlayır (Foto)

27 İyun 2026 08:41

Baxış: 374

VTB-də minimal faiz dərəcəsi ilə nağd kredit 9.9%-dən

#DÜNYADA

Nigeriyada hazırlanan və elektrik tələb etməyən xüsusi soyutma sistemi xüsusilə enerjiyə əlçatanlığın məhdud olduğu bölgələrdə qida məhsullarının daha uzun müddət təzə qalmasını təmin edir. Tamamilə gil, su və qumdan istifadə edilərək çalışan sistem buxarlanma yolu ilə daxili temperaturu aşağı salaraq meyvə və tərəvəzlərin saxlama müddətini uzadır.

Milli.Az xəbər verir ki, sistem bir-birinin içinə yerləşdirilmiş iki gil qabdan ibarətdir. İki qab arasındakı boşluq nəm qumla doldurulur və üst hissəsi isə nəm bir parça ilə örtülür. Xarici qabdakı su buxarlandıqca, içəridəki istilik xaricə çıxır və təbii bir soyutma effekti yaranır. Beləliklə, soyuducu heç bir elektrik enerjisinə ehtiyac duymadan işləyir.

Sistemin yaradıcısı nigeriyalı müəllim Məhəmməd Bah Abba bu metodu 1990-cı illərdə, xüsusilə səhra iqlimində yaşayan fermerlərin məhsullarını daha uzun müddət saxlaya bilməsi üçün hazırlayıb. Uyğun hava şəraitində sistem, daxili temperaturu mühit temperaturundan 14 dərəcəyə qədər daha aşağı səviyyəyə endirə bilir. Bu sayədə pomidor, bibər, badımcan və yarpaqlı tərəvəzlər normaldan çox daha uzun müddət təzəliyini qoruya bilir.

Bu təbii soyutma metodu ən yaxşı isti və quru iqlimlərdə işləyir, çünki sistemin əsasında suyun buxarlanması dayanır. Rütubət nisbətinin yüksək olduğu bölgələrdə buxarlanma yavaşladığı üçün soyutma effekti də azalır. Mütəxəssislər bildirirlər ki, sistem kölgəlik və hava axını olan yerdə istifadə edilməlidir. Ət, süd və çox aşağı temperatur tələb edən məhsullar üçün uyğun olmayan bu sistem, xüsusilə meyvə-tərəvəzin saxlanılmasında aşağı büdcəli və ekoloji cəhətdən təmiz bir alternativ kimi diqqət çəkir.

Müəllif: Ülkər Vəliyeva (Milli.Az redaktor)