Sobada asan tərəvəzli kartof börəyi

Yuxa açmadan asanlıqla hazırlanan, çölü xırçıltılı, içi isə yumşaq qalan bu börək kartof, rəngli tərəvəzlər, təzə göyərtilər və müxtəlif pendirlərlə süfrələrinizə doyumlu bir ləzzət qatır. Bütün ərzaqların tək qabda qarışdırılması ilə zəhmətsiz hazırlanan bu resept səhər yeməyindən çay süfrəsinə qədər günün istənilən saatında servis edilə bilər.

Milli.Az lazım olan ərzaqları təqdim edir:

5 ədəd orta boy kartof

3 ədəd yumurta

1,5 stəkan qatıq

1 stəkan un

Yarım stəkan bitki yağı

1 paket qabartma tozu

1 ədəd böyük baş soğan

1 ədəd yerkökü

1 ədəd qırmızı kapya bibər

1 ədəd yaşıl bibər

Yarım dəstə cəfəri, 1/4 dəstə şüyüd

1 stəkan rəndələnmiş kaşar pendiri, yarım stəkan ovulmuş ağ pendir

1 çay qaşığı duz, 1 çay qaşığı quru nanə, 1 çay qaşığı pul bibər, 1 çay qaşığı toz qırmızı bibər, yarım çay qaşığı qara istiot

Üzəri üçün: 1 xörək qaşığı küncüt, 1 xörək qaşığı çörəkotu.

Hazırlanması:
Kartofların qabığını soyub kiçik kubiklər şəklində doğrayın. Soğanı, qırmızı və yaşıl bibərləri incə şəkildə doğrayın. Yerkökünü sürtgəcdən keçirin, cəfəri və şüyüdü xırda-xırda doğrayın.

Yumurtaları geniş bir qaba qırıb çalın. Qatıq və bitki yağını əlavə edib qarışdırın. Un və qabartma tozunu əlavə edərək hamar bir qarışıq əldə edin.

Doğradığınız kartof, tərəvəz və göyərtiləri hazırladığınız xəmirin içinə tökün. Ağ pendir, kaşar pendiri, duz və ədviyyatları əlavə edib bütün ərzaqları yaxşıca qarışdırın.

Qarışığı yağlanmış orta boy bir soba qabına (təpiyə) töküb üzərini spatula ilə düzləyin. Üzərinə küncüt və çörəkotu səpin.

Əvvəlcədən isidilmiş 175 dərəcəlik sobada, kartoflar yumşalana və üzəri qızarana qədər təxminən 50-55 dəqiqə bişirin.

Sobadan çıxardıqdan sonra 10 dəqiqə dincəlməyə qoyun ki, rahat dilimlənsin.

Kartofları kiçik və bərabər ölçülərdə doğrayın ki, hər tərəfi eyni vaxtda bişsin.

Əgər tərkibində balqabaq və ya ispanaqdan istifadə edirsinizsə, tərəvəzlərin artıq suyunu sıxıb çıxarın.

Xəmirin çox sulu olmamasına diqqət edin; ehtiyac olarsa, bir az un əlavə edə bilərsiniz.

Dilimlərin dağılmaması üçün böreyi sobadan çıxardıqdan sonra mütləq bir az gözlədin.

Nuş olsun!

Müəllif: Ülkər Vəliyeva (Milli.Az redaktor)