Dəmiryolu sistemində gücləndirilmiş iş rejiminə keçildi - YENİLƏNİB

12:28

Havaların sərt keçməsi ilə bağlı əlaqədar sərnişinlər rahat və ucuz nəqliyyat vasitəsi kimi dəmir yolunun xidmətlərindən istifadəyə üstünlük verirlər.

"Azərbaycan Dəmir Yolları" QSC-dən Trend-ə verilən məlumata görə, Sərnişin daşımaları Departamenti sərnişin axınını nəzərə alaraq sərnişin qatarlarına əlavə vaqonun qoşulmasını təmin edir.

Ölkənin qərb istiqamətinə hərəkət edən sərnişin qatarlarına bu gün əlavə 8 vaqon qoşulacaq.

Digər sərnişin qatarlarına da tələbat olacağı təqdirdə əlavə vaqonların qoşulması təmin ediləcək.

-----------
12:06

"Azərbaycan Dəmir Yolları" QSC-nin Mətbuat Katibliyindən Trend-ə verilən məlumata görə, cəmiyyətin kollektivləri havaların sərt keçməsi ilə bağlı əlaqədar gücləndirilmiş iş rejiminə keçib.

Sərnişinlərin və hərəkət tərkiblərinin təhlükəsizliyinin təmin edilməsi məqsədilə bir sıra tədbirlər reallaşdırılır. İnfrastruktur Departamentinin kollektivi tərəfindən dəmir yolunun üst quruluşu elementlərinə - rels bərkidicilərinə, relslər arasındakı məsamələrə, siqnal və enerji təchizatı sistemlərinə gün ərzində bir neçə dəfə baxış keçirilir.

Sərnişin daşımaları Departamenti də bir sıra vacib məqamlara diqqəti artırıb. Belə ki, reysə çıxmazdan əvvəl sərnişin vaqonlarının istilik sisteminin normal işləməsi diqqətdə saxlanılır.

Qarlı-şaxtalı hava şəraitinə baxmayaraq, qrafikə əsasən, bu gün Bakı-Moskva, Bakı-Ağstafa-Qazax, Bakı-Astara-Horadiz, Bakı-Böyük Kəsik, Bakı-Köçərli-Balakən sərnişin qatarları mənzil başına çatıb. Bakı-Tbilisi sərnişin qatarı isə müəyyən gecikmə ilə Bakı sərnişin stansiyasına qəbul olunacaq.

Bəzi qısamüddətli gecikmələri nəzərə almasaq, qatarların qəbulu və yola salınması müəyyən olunmuş qrafikə əsasən həyata keçirilir.

---------
10:32

Azərbaycanda qarlı və şaxtalı hava şəraitinə baxmayaraq, qatarlar müəyyən edilmiş qrafikə uyğun hərəkət edirlər. Bu barədə Trend-ə "Azərbaycan Dəmir Yolları" QSC-nin mətbuat katibi Nadir Əzməmmədov bildirib.

Onun sözlərinə görə, qrafikə əsasən, bu gün Bakıya Moskva, Astara və Qazaxdan reyslər gəlib, eləcə də cədvələ əsasən, Tbilisi, Balakən və Böyük Kəsikdən qatarların gələcəyi gözlənilir: "Yerli, eləcə də beynəlxalq reyslərdə gecikmələr yoxdur. Qatarların qəbulu və yola salınması müəyyən olunmuş qrafikə əsasən həyata keçirilir".

Milli.Az