Qışda hamının etdiyi səhv - Evdə uşaq varsa, nəticəsi daha da pis olur

Paltarların evin içində paltar ipində və ya radiator üzərində qurudulması rütubəti artırır, kif göbələklərinin yaranmasına şərait yaradır və xüsusilə uşaqlar üçün ciddi sağlamlıq riskləri doğurur.

Milli.Az xəbər verir ki, Araşdırmalara görə paltarlar evin içində qurudulduqda havada həddindən artıq rütubət yaranır. Rütubətin yüksəlməsi "kif" adlanan göbələklərin formalaşmasına səbəb olur. Bu göbələklərin yaydığı sporlar tənəffüs yollarına təsir göstərərək infeksiyalar, allergik reaksiyalar və ağciyər xəstəlikləri yarada, mövcud astma və bronxit kimi xroniki problemləri ağırlaşdıra bilər.

Mütəxəssislər qeyd edir ki, paltar asılan otaqda yatmaq riski daha da artırır. Körpəli evlərdə isə bu təhlükə ikiqatdır. Körpələr rütubətə və havadakı allergenlərə qarşı daha həssas olduqları üçün tənəffüs yollarında tıxanma və digər fəsadlar yarana bilər.

Bundan əlavə, ətirli və parfümlü deterjanların qalıqları evdə qurudulan paltarlardan havaya yayılaraq uzun müddət tənəffüs edildikdə yuxarı tənəffüs yollarını qıcıqlandıra və gün boyu narahatlıq hissi yarada bilər.

Çarə nədir?

Mütəxəssislər evdə paltar qurudulmasının yaratdığı risklərin qarşısını almaq üçün aşağıdakı tədbirləri tövsiyə edir:

• Mümkün olduqda paltarları açıq havada qurudun.
• Qapalı məkanda qurudulma zəruridirsə, otağı tez-tez havalandırın.
• Rütubətölçən və ya rütubətazaldıcı cihazlardan istifadə edin.
• Paltar qurudulan otaqda yatmayın, xüsusilə körpə və uşaqları bu məkandan uzaq saxlayın.
• Az ətirli və ya hipoallergen deterjanlara üstünlük verin.
• Radiator üzərində paltar qurudulmasından çəkinin.

Qeyd edək ki, sağlam yaşayış mühiti üçün ev daxilində rütubət səviyyəsi nəzarətdə saxlanılmalı və buxar yaradan vərdişlər minimuma endirilməlidir. Düzgün qurudulma üsulları həm tənəffüs sağlamlığını qoruyur, həm də ev mühitinin keyfiyyətini artırır.

İsmayıl
Milli.Az