Cəmiyyət

Suraxanıda söküntü qalmaqalı: Sahibkarların tələbi nədir?

6 Noyabr 2026 18:48

Baxış: 71

VTB-də minimal faiz dərəcəsi ilə nağd kredit 9.9%-dən

Bakının Suraxanı rayonunda söküntü işləri ilə əlaqədar sahibkarlar narazılıqlarını bildirirlər. Ərazidəki qeyri-yaşayış obyektlərinin sahibləri söküntü müqabilində kompensasiya ödənilməsini və ya onlara başqa yerdə fəaliyyət göstərmək üçün şərait yaradılmasını istəyirlər.

Milli.Az xəbər verir ki, rayonda həyata keçirilən söküntü prosesi yaşayış evləri ilə yanaşı, sahibkarlıq obyektlərini də əhatə edir. Bildirilir ki, ərazidəki bəzi obyektlərin sahiblərinə tikililəri boşaltmaları barədə xəbərdarlıq olunub.

Sahibkarlar bildirirlər ki, indiyədək onlara kompensasiyanın ödənilməsi ilə bağlı konkret məlumat verilməyib. Onların sözlərinə görə, uzun illərdir fəaliyyət göstərdikləri obyektlər əsas dolanışıq mənbəyidir. Başqa əraziyə köçmək isə mövcud biznesin yenidən qurulmasını və əlavə xərcləri zəruri edir.

Obyekt sahiblərinin bir qismi maddi təzminat, digərləri isə sökülən obyektlərin əvəzinə alternativ ərazidə yeni iş yeri ilə təmin olunmağı tələb edir.

Məsələ ilə bağlı Suraxanı Rayon İcra Hakimiyyətindən bildirilib ki, söküntü işlərinin təşkili qurumun səlahiyyətlərinə daxil deyil. Qeyd olunub ki, proses Nazirlər Kabinetinin müvafiq qərarına əsasən həyata keçirilir.

Nazirlər Kabinetindən isə məsələ ilə bağlı araşdırmaların davam etdiyi bildirilib. Yekun qərar verildikdən sonra ictimaiyyətə əlavə məlumat təqdim olunacaq.

Müəllif: Aysel Əkbər (Milli.Az müxbir)