Daha bir dövlət müəssisəsi ləğv edildi

İqtisadiyyat Nazirliyi yanında Əmlak Məsələləri Dövlət Xidmətinin balansında olan "İstehsalat Texnoloji Komplektləşdirmə Dövlət Müəssisəsi" Məhdud Məsuliyyətli Cəmiyyəti (MMC) ləğv olunduğunu elan edib.

Bu barədə İqtisadiyyat Nazirliyi yanında Dövlət Vergi Xidmətinin rəsmi nəşri olan "Vergilər" qəzetində məlumat dərc edilib.

Məlumata əsasən, müəssisənin ləğvi ilə əlaqədar kreditorlar öz tələblərini iki ay ərzində təqdim edə bilərlər. Kreditorlara müraciətlərini müəyyən edilmiş müddət ərzində AZ1029, Bakı şəhəri, Nizami rayonu, Heydər Əliyev prospekti, ev 139 ünvanına bildirmək tövsiyə olunur.

Ləğvetmə prosesi çərçivəsində kreditorların tələblərinin qanunvericiliklə müəyyən edilmiş qaydada qəbul edilməsi nəzərdə tutulur. Müəssisəyə qarşı maliyyə və ya digər öhdəlikləri olan şəxslər və təşkilatlar öz tələblərini müvafiq sənədlərlə əsaslandıraraq göstərilən ünvana təqdim edə bilərlər.

Dövlət Vergi Xidmətinin məlumat bazasında yer alan məlumatlara görə, "İstehsalat Texnoloji Komplektləşdirmə Dövlət Müəssisəsi" MMC 17 iyul 1996-cı il tarixində dövlət qeydiyyatına alınıb. Müəssisənin VÖEN-i 1700030121-dir. Vergi uçotu Bakı şəhəri Lokal Gəlirlər Baş İdarəsində aparılır.

Qurumun hüquqi ünvanı Bakı şəhəri, Səbail rayonu, Gülbala Əliyev küçəsi, ev 9 kimi göstərilib. Müəssisənin nizamnamə kapitalı 50 manat təşkil edir.

Vergi ödəyicisi kimi qeydiyyatda olan müəssisə ƏDV məqsədləri üçün də qeydiyyatdadır. Dövlət Vergi Xidmətinin məlumatında onun aktiv vergi ödəyicisi olduğu, riskli vergi ödəyicisi hesab edilmədiyi və dövlət büdcəsinə vergi borcunun olmadığı qeyd edilir. Belə ki, məlumatların təqdim edildiyi tarixə müəssisənin vergi borcu sıfır manat göstərilib.

Qeyd edək ki, hüquqi şəxsin ləğvi prosesi onun fəaliyyətinin dayandırılması ilə yanaşı, mövcud öhdəliklərinin müəyyənləşdirilməsini və kreditorların tələblərinin qəbul edilməsini də əhatə edir. Bu baxımdan, müəssisənin kreditorlarının elan edilmiş iki aylıq müddət ərzində tələblərini bildirmələri vacibdir.

Müəssisənin ləğvinin səbəbləri və prosesin başa çatacağı tarix barədə dərc olunmuş məlumatda əlavə açıqlama verilməyib.

Müəllif: Malik Məlikov (Milli.Az redaktor)