Yasamalda torpaq qiyməti 1 milyona yaxınlaşır: Bahalaşmanın səbəbi nələrdir? - (Foto)

Yasamal və Yeni Yasamal bir vaxtlar paytaxtda nisbətən əlçatan qiymətə torpaq tapılan əsas ərazilərdən biri idi. Son illər isə vəziyyət dəyişib və bəzi elanlarda 4-5 sot torpaq sahəsinin qiyməti 700-800 min manata, hətta daha yüksək rəqəmlərə qədər yüksəlib. Bu artım bazarın real vəziyyətini, yoxsa süni qiymət formalaşmasını müzakirə mövzusuna çevirib.

"Mənim yanaşmama görə, torpaq daşınmaz əmlakın artırılması mümkün olmayan növüdür. Köhnə tikililərin sökülərək yerində daha iri və yeni binaların inşa edilməsi mümkündür, lakin torpaq sahəsinin özü artırıla bilmir. Bu faktor uzunmüddətli qiymət artımının əsas struktur səbəblərindən biridir".

Milli.Az xəbər verir ki, bunu "Yeni Sabah"a Azərbaycan Qiymətləndiricilər Cəmiyyətinin (AQC) sədri Vüqar Oruc bildirib. 

Onun sözlərinə görə, əhalinin artımı və şəhərləşmənin genişlənməsi torpağa tələbi artırdığı üçün hər nəfərə düşən ehtiyat azalır və nəticədə torpaq daha çox uzunmüddətli investisiya alətinə çevrilir:

"Qısa müddətdə gəlir əldə etmək istəyənlər üçün mənzil və ya kommersiya obyektlərinə investisiya daha uyğun ola bilər. Lakin torpaq illər ərzində dəyər qazanan strateji aktiv kimi nəzərdən keçirilməlidir. Onun qiymətləri bundan sonra da artmaqda davam edəcək. Hətta müəyyən mənfi iqtisadi hadisələr baş versə belə, hazırkı mərhələdə qiymətlərin azalacağı ehtimalını aşağı görürəm.

Yasamal ərazisi bu baxımdan ölkənin əsas inkişaf zonalarından biridir. Bu rayonda torpaqdan istifadə daim yüksək aktivliklə müşahidə olunur və bu ərazi həm sıxlıq, həm də rəqabət baxımından çox cəlbedicidir.

Gələcək şəhərsalma planlarına əsasən, paytaxtda idarəetmə və inkişaf bir mərkəz ətrafında deyil, çoxmərkəzli sistem üzərində qurulacaq. Bu kontekstdə Yasamal da əsas mərkəzlərdən biri kimi ön plana çıxır və şəhərin inkişafında mühüm rol oynayır".

Müəllif: Malik Məlikov (Milli.Az redaktor)