Sosial şəbəkələrdə saxta iş elanları: Aldadıcı tələlər

Son zamanlar sosial şəbəkələrdə və müxtəlif internet platformalarında paylaşılan iş elanları cəmiyyətin diqqətini cəlb edir. Lakin müraciət edən bir çox şəxs sonradan anlayır ki, bu elanların bəziləri sadəcə aldadıcı məqsədlərlə paylaşılıb. Elanlarda təqdim olunan yüksək maaş, rahat iş saatları və cazibədar şərtlər əslində reallığı əks etdirmir. Əsl niyyət isə çox vaxt şəxsi məlumat toplamaq, foto tələb etmək və ya başqa məqsədlər olur. Bu hal isə vətəndaşlar arasında narahatlıq doğurur.

Məsələ ilə bağlı sosioloq Üzeyir Şəfiyev Milli.Az-a açıqlamasında bildirib ki, bu gün sosial şəbəkələr üzərindən öz hüquqi məsuliyyətini başa düşməyən bir sıra istifadəçilər real həyatda olan dələduzluğu sosial şəbəkələrə də yansıdırlar.

Ü.Şəfiyevin sözlərinə görə, bəziləri sosial şəbəkələri "boz zona" kimi görərək istədikləri qanunsuz davranışları nümayiş etdirirlər:

"Elə bilirlər ki, burada istənilən addımı ata bilərlər və heç bir hüquqi məsuliyyət daşımırlar. Amma onlar yanılırlar. Necə ki, real həyatda dələduzluq halları hüquqi müstəvidə araşdırılır və cəzalandırılır, eyni qayda onlayn platformalarda da tətbiq edilir".

Sosioloq vurğulayıb ki, hüquq-mühafizə orqanları artıq sosial şəbəkələrdə törədilən belə əməllərlə bağlı bir sıra tədbirlər həyata keçirib və bu cür əməllərin cəzasız qalmadığını göstərib.

Həmsöhbətimiz söyləyib ki, bu tip istifadəçilər diqqətli olmalı və bilməlidirlər ki, həm hüquqa, həm də etikaya zidd davranışlar məsuliyyət yaradır.

Şəfiyev eyni zamanda qeyd edib ki, belə tələlərə düşən qurbanların maariflənməsi də xüsusi önəm daşıyır:

"İnsanlar bilməlidirlər ki, belə dələduzlar var və onların tələsinə düşməmək üçün hüquqi baxımdan məlumatlı olmalıdırlar. Əgər belə hallarla qarşılaşsalar, dərhal hüquq-mühafizə orqanlarına müraciət etməlidirlər".

Sosioloq hesab edir ki, həm hüquqi, həm də ictimai müstəvidə belə halların ifşa edilməsi, eləcə də ictimai iştirakçılığın artırılması dələduzluqla mübarizədə mühüm rol oynayır.

Mina Mikayılova
Milli.Az