Cəmiyyət

Cenevrədə beynəlxalq telekommunikasiya tədbiri keçirilir

8 Dekabr 2022 09:41
Baxış: 527

İsveçrənin Cenevrə şəhərində BMT-nin ixtisaslaşdırılmış qurumu olan Beynəlxalq Telekommunikasiya İttifaqının İnkişaf Bürosunun Rəqəmsal Transformasiya üzrə 2-ci Tədqiqat Qrupunun ilk iclası keçirilib.

Milli.Az xəbər verir ki, 5 dekabr tarixindən keçirilən Tədqiqat Qrupunun ilk iclasında Beynəlxalq Telekommunikasiya İttifaqının İnkişaf Bürosunun direktoru, həmçinin cari ilin 26 sentyabr - 14 oktyabr tarixlərində Rumuniyanın Buxarest şəhərində keçirilmiş Beynəlxalq Telekommunikasiya İttifaqının Səlahiyyətli Konfransında təşkilatın yeni baş katibi vəzifəsinə seçilmiş xanım Doreen Bogdan-Martinin təbrik nitqi dinlənilib.

Ardınca tədbir iştirakçılarına işçi qrupunun yeni seçilmiş sədr və sədr müavinləri təqdim edilib.

Həmin sədr müavinlərindən biri də, Azərbaycanı sözügedən iclasda təmsil edən, Rəqəmsal İnkişaf və Nəqliyyat Nazirliyinin əməkdaşı olan Müşfiq Quluyevdir. Cari ilin 6-16 iyun tarixlərində Ruandanın Kigali şəhərində dünyanın 150-dən çox ölkə nümayəndəsinin iştirakı ilə keçirilmiş Ümumdünya Telekommunikasiya İnkişaf Konfransında ölkəmizin namizədi Müşfiq Quluyev Beynəlxalq Telekommunikasiya İttifaqının İnkişaf Bürosunun Rəqəmsal Transformasiya üzrə 2-ci Tədqiqat Qrupunun sədr müavini vəzifəsinə seçilib.

Qeyd olunan Tədqiqat Qrupunda ölkəmizin nümayəndəsi ilə yanaşı, Misir, Yaponiya, Cənubi Korea, Çin, Nigeria, Qvineya, Paraqvay, Fransa, Rumuniya, Özbəkistan və Birləşmiş Ərəb Əmirlikləri kimi ölkələrdən olan beynəlxalq mütəxəssislər də rəhbər vəzifələrdə təmsil olunur.

Dekabrın 5-dən start götürən iclasda BMT-nin Dayanıqlı İnkişaf Məqsədləri üzrə hədəflərə və onların spesifik inkişaf prioritetlərinə nail olmaq üçün xüsusi əhəmiyyət kəsb edən sualların araşdırılması üzrə Tədqiqat Qrupunun fəaliyyət istiqamətləri və qarşıda duran vəzifələr müəyyən edilib. Qeyd olunub ki, bu məqsədlə Tədqiqat Qrupu tərəfindən "Dayanıqlı ağıllı şəhərlər və icmalar", "E-səhiyyə" və "E-təhsil" daxil olmaqla, "Elektron xidmətlər və tətbiqlər üçün texnologiyaların tətbiqi", "İnformasiya və kommunikasiya şəbəkələrinin mühafizəsi: Kibertəhlükəsizlik mədəniyyətinin inkişafı üçün ən yaxşı təcrübələr", "Telekommunikasiya/İKT avadanlığı: Uyğunluq və qarşılıqlı fəaliyyət, mobil cihazların saxtalaşdırılması və oğurluğu ilə mübarizə", "Telekommunikasiya/İKT-nin mənimsənilməsi və rəqəmsal bacarıqların inkişafı", "Ətraf mühit üçün İKT", "İnsanların elektromaqnit sahələrinə məruz qalması ilə bağlı strategiyalar və siyasətlər" kimi məsələlər gündəmdə saxlanılacaq. Sadalanan mövzularla bağlı sualların araşdırılması ilə yanaşı, 2022-2025-ci illərdə beynəlxalq hesabatların hazırlanması üzrə mərhələli fəaliyyət həyata keçiriləcəkdir. Bundan başqa, Beynəlxalq Telekommunikasiya İttifaqının Konstitusiyası ilə müəyyən edilmiş reqlamentə görə, Rəqəmsal Transformasiya üzrə 2-ci Tədqiqat Qrupunun fəaliyyətinin səlahiyyət müddəti dörd il olmaqla 2022-2025-ci illəri əhatə edəcəkdir. Nümayəndələrin sözügedən tədqiqat qrupuna seçim imkanı isə cəmi 2 dəfə ilə məhdudlaşdırılmışdır.

Tədqiqat Qrupunun iclasının 2022-ci ilin 9 dekabr tarixinədək davam etməsi nəzərdə tutulub.

Xatırladaq ki, Azərbaycanın nümayəndəsi ilk dəfədir ki, Beynəlxalq Telekommunikasiya İttifaqının İnkişaf Bürosunun 2-ci Tədqiqat Qrupunda rəhbər vəzifəyə seçilərək təmsil olunur. Təmsilçimiz Müşfiq Quluyev 15 ildən artıqdır telekommunikasiya sahəsində fəaliyyət göstərir. O, Rəqəmsal İnkişaf və Nəqliyyat Nazirliyinin əməkdaşı, Azərbaycan Respublikası Biznes Mühiti və Beynəlxalq Reytinqlər üzrə Komissiyanın "İnternetə qoşulma və internet infrastrukturu" işçi qrupunun katibi, Avropa İttifaqının Şərq Tərəfdaşlığı üzrə Tənzimləyicilərin Müstəqilliyi və Genişzolaqlı İnternetin İnkişafı İşçi Qrupunun eksperti, beynəlxalq texniki təşkilat olan IEEE-nin yüksək dərəcəli üzvüdür. M.Quluyev 2021-ci ildə Azərbaycan Prezidentinin Sərəncamı ilə rabitə və informasiya sahəsində səmərəli fəaliyyətinə görə "Tərəqqi" medalı ilə də təltif edilib.

Kamran Seyidov
Milli.Az

Məqaləyə dair fotomateriallar:

İllik 12,99%-dən 40 000 manatadək zaminsiz komissiyasız kredit
Azernews Newspaper

XƏBƏR LENTİ

Copyright © 2023 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.

Global site tag (gtag.js) - Google Analytics