Cəmiyyət

Macəraya aparan yol - FOTO

20 İyun 2022 10:30
Baxış: 5 197

Azərbaycanın gözəl təbiətli, xoş mənzərəli məkanlarından olan Qubada fəaliyyət göstərən otellər arasında Macara Lake Park fərqlidir. Xidməti, məkanı, aurası, ab-havası - bir sözlə, çox məqamlarına görə.

Həmsöhbətimiz Qubada yerləşən Macara Lake Park otelinin Direktoru Faiq Məmmədovdur.

- Salam, Faiq bəy.

- Salam, Macara Lake Park otelinə xoş gəlibsiniz.

- Faiq bəy, qarşıdan istirahət mövsümü gəlir, bu yay Macara otelində qonaqları nə kimi yeniliklər, hansı xidmətlər gözləyir?

- Bu yay qonaqlarımızı çoxlu sayda yeniliklər və xoş sürprizlər gözləyir. Ən əsas yeniliklərimizdən biri odur ki, "Lake Park" adlı, 74 otaqlı yeni otel binası 1 may tarixindən etibarən istifadəyə verilib. 2 mərtəbəni əhatə edən böyük Macara SPA mərkəzimiz də məhz yeni "Lake Park" otel binamızda yerləşir.

- Bu o dəməkdir ki, bu ildən siz artıq SPA xidmətləri də təqdim edəcəksiniz?

- Doğrudur, SPA xidmətlərimiz otaq gecələmə qiymətlərinə daxildir. SPA mərkəzimizə, bəylər və xanımlar üçün ayrı olmaqla: Türk və Fin hamamları, müalicəvi duz otağı, buxar otağı, fitosauna və sidr çəlləkləri, cakuzzi, həmçinin tam təchizatlı böyük fitness mərkəzi daxildir. SPA mərkəzinə aid olan böyük qapalı hovuzumuz isə gölə baxan mənzərəsi ilə qonaqlarımızın sevimli guşəsinə çevrilib. İsidilmə xüsusiyyətli bu hovuzumuzun önündəki şüşə lövhələr açılmaqla yayda qapalı hovuzdan açıq hovuz tipinə çevrilir.

- Bəs qonaqların asudə vaxtını keçirməsi üçün hansı əyləncə vasitələri yaradılıb?

- Həm uşaqlar və həm də böyüklər üçün əyləncə imkanlarımız genişdir. Bu ildən etibarən Çənlibel gölündə 12 ədəd 4 nəfərlik katamaranlarınlarımız fəaliyyətə başlayıb. Çox əyləncəli bir fəaliyyət növüdür. Uşaqlar üçün qapalı və açıq oyun meydançaları və uşaq dayə xidməti mövcuddur. Ərazidə futbol, volleybol, bilyard, stolüstü oyunlar, darts və bir sıra digər əyləncə növləri mövcuddur. Məlumat üçün deyim ki, otel ərazisində uşaqlar və gənclər üçün nəzərdə tutulan yeni Macara Land adlı layihənin üzərində intensiv işlər aparılır və bu ilin sonunadək boulinq, avtodrom, karusel və digər möhtəşəm əyləncələrdən ibarət olacaq zonanı qonaqlarımıza təqdim etməyi planlaşdırırıq.

Qonaqlarımızın çox sevdiyi digər əyləncə növü isə balıqtutmadır. Belə ki, balıqtutma vasitələrini minimal qiymətə icarəyə götürməklə bu əyləncəli fəaliyyət növündən yararlanmaq olar. Hətta tutduğunuz balıqları restoranlarımızda özəl olaraq sizin üçün hazırlanma üçün də verə bilərsiniz.

- Bəs göldə balıqlar çoxdurmu?

- Bəli. Biz Çənlibel gölünün və göldəki biomüxtəlifliyin konservasiyası üçün öz çiyinlərimizə bir məsuliyyət yükləmişik. İl ərzində 3-4 dəfə xüsusi balıqyetişdirmə məntəqələrindən gətirilən sazan, belamur və digər balıq növləri gölə buraxılaraq yetişdirilməsi təmin edilir.

- Çənlibel gölü ilə əlaqəli Macara oteli tərəfindən başqa hansı işlər görülür?

- Bildiyiniz kimi, Macara Village Resort Otel kompleksi 2018-ci ildən fəaliyyət göstərir və bölgədə sahibkarlığın, turizm infrakstrukturunun yaradılması üzrə investisiya təşfiq proqramının iştirakçısıdır. Qanunvericiliyə uyğun şəkildə Çənlibel gölü turizm təyinatlı istifadə məqsədilə müqavilə əsasında dövlətdən icarəyə götürülmüşdür. Macara otel kompleksi olaraq biz bu məsuliyyətdən irəli gələn bütün konservasiya işlərini müntəzəm və planlı şəkildə icra edirik. Belə ki, icarə üzrə utilizasiya proqramından öncə gölün yaxınlığındakı bır sıra iaşə obyektlərindən çirkab suları birbaşa olaraq gölə axıdılırdı. İcarə üzrə konservasiya öhdəliklərimizin başlandığı ilk ildə tərəfimizdən aparılan geniş bərpa və konservasiya proqramı əsasında əraziyə təmizləyici qurğular yerləşdirildi və Çənlibel gölünə çirkab sularının axıdılmasının qarşısı tamamilə alındı. Ötən əsrin 70-ci illərində suvarma məqsədilə yaradılmış bu göldə suyun səviyyəsinin son illərdə azalması tendensiyası müşahidə edilirdi. Bunun qarşısının alınması məqsədilə, otel rəhbərliyi tərəfindən özəl investisiya hesabına yaxınlıqdakı yeraltı su mənbələrindən mexaniki su xətti çəkilərək müntəzəm şəkildə gölün suyunun yenilənməsi həyata keçirilmişdir və öncəki illərlə müqayisədə suyun səviyyəsi bərpa olunmuşdur. Həmçinin təbiətin ahəngini və vizual gözəlliyi pozmadan göl ətrafı piyada səkilərinin qurulması və gölə aparan avtomobil yollarının bərpası tərəfimizdən həyata keçirilmişdir. Ümumiyyətlə Macara otel kompleksinin tikilməsi və otelə aid infrastrukturun yaradılması işləri aparılarkən ərazinin relyefinə ciddi həssaslıqla yanaşılmışdır. Hətta ərazilərin daha da yaşıllaşdırılması istiqamətində xeyli işlər görülmüş və ərazidə çoxlu sayda ağacların əkilməsi həyata keçirilmişdir. Lakin təəssüf hissi ilə qeyd etməliyəm ki, turizm kompleksinin inşası müddətində tərəfimizdən aparılan bir sıra işlərə maneələr də yaradılır, müxtəlif məqsədlər ilə bəzən mediada reallığı əks etdirməyən saxta məlumatlar paylaşılır. Bu tip qanuna-zidd əməllərin qarşısını almaq üçün hətta məhkəməyə də müraciət etdiyimiz hallar olub və qanun çərçivəsində problemlərin həllinə nail olmuşuq.

- Geniş məlumat üçün təşəkkür edirik, Faiq bəy, bəs bu gün Quba Macara otelində neçə nəfər işçi çalışır?

- İşçi sayımız 200-dən bir qədər artıqdır və böyük əksəriyyəti Qubanın və ətraf kəndlərin sakinləridir. Bütün departamentlər üzrə işçi personalımızın xidmət keyfiyyətinin artırılması istiqamətində müntəzəm olaraq işlər aparılır və tərəfimizdən geniş təlim proqramları həyata keçirilir. Ali təhsilli gənclər üçün daha geniş imkanlar yaratmağa və karyera qurmağı üçün faydalı işlər görməyə çalışırıq. Həmçinin qeyd etməliyəm ki, regionda yaşayan və təhsilə marağı olan yeniyetmələrə də təhsil almaqları üçün "Macara Club" olaraq dəstək proqramımız mövcuddur və bu proqramdan artıq bir neçə gənc faydalanıb.

- Qonaqlarınız kifayət qədər varmı? Otel gəlirli olaraq çalışırmı?

- Regionlarda fəaliyyət göstərən resort tipli otellərin fəaliyyəti bildiyiniz kimi Azərbaycanda mövsümi xarakter daşıyır. Qış aylarında tələbat olduqca aşağı olur, yay aylarında isə təbii olaraq artır. Bu biznesin mövsümlük xüsusiyyəti sahibkarlar üçün bir sıra çətinliklər yaradır və xərclərin artmasına səbəb olur. Gəlirliliklə bağlı sualınıza cavab olaraq demək istərdim ki, il sonunun nəticələrinə görə hələ ki otelimiz zərərlə çalışır və biz çox ümid edirik ki, önümüzdəki illərdə ölkəmizdə həm daxili və həm də gəlmə xarici turizm daha da geniş vüsət alacaq və oteldə doluluqlarımız artacaqdır.

- Otelinizin əsas müştəriləri kimlərdir?

- Otel qonaqlarımızın böyük əksəriyyətini ailələr təşkil edir. Çünki otelimizdə ailələrin istirahəti üçün hər şərait təmin edilib. Otelin əsas binası ilə yanaşı çoxsaylı kotec, "townhouse" və villalar üzrə çoxsaylı otaq kateqoriyalarımızın mövcudluğu, gözəl təbiət, dadlı yeməklər, SPA və hovuz, böyüklər və uşaqlar üçün əyləncə çeşidlərinin olması otelimizi seçən ailələrin məmnunluğunu təmin edir. Bundan başqa bizim xeyli sayda loyal qonaqlarımız var ki, onlar il ərzində bir neçə dəfə və müxtəlif mövsümlərdə otelimizi ziyarət edirlər. Fərdi müştərilər ilə yanaşı biz həmçinin bir sıra korporativ müştərilər və turizm agentlikləri ilə də sıx tərəfdaşlıq bağları qurmağa nail olmuşuq. Belə ki, müxtəlif şirkətlərin işçi heyətləri qrup şəklində istirahət üçün otelimizə səfərlər edir və olduqca məmnun bir şəkildə otelimizdən ayrılırlar. Qeyd etməliyəm ki, son aylarda xarici qonaqların da gəlişində ciddi artım müşahidə olunur.

- Faiq bəy, sizinlə həmsöhbət olmaq çox xoş oldu, vaxt ayırdığınız üçün sizə təşəkkür edirik.

- Mən də sizə təşəkkür edirəm və redaksiyanıza uğurlar arzu edirəm.

Milli.Az

Məqaləyə dair fotomateriallar:

İllik 14.5%-dən 30 000 manat zaminsiz komissiyasız kredit

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.

Global site tag (gtag.js) - Google Analytics