Siyasət

“İsrael HaYom”: İsrail PUA-larının alınması və uğurlu istifadəsi ermənilər üçün gözlənilməz və heyrətli oldu

27 Sentyabr 2021 13:18
0 Şərh     Baxış: 648

Bu gün Azərbaycan regionda böyük qüvvə, Cənubi Qafqazda geosiyasi və geoiqtisadi proseslərin lideridir. Onun iştirakı olmadan regionda heç bir geosiyasi və geoiqtisadi layihənin həyata keçirilməsi mümkün deyil. Cənubi Qafqaz regionunda müəyyən geosiyasi problemlər olmasına baxmayaraq İsrail və Azərbaycan möhkəm strateji və sarsılmaz siyasi, iqtisadi və hərbi-texniki tərəfdaşlıq qurmağa nail olublar.

Milli.Az AZƏRTAC-a istinadən bildirir ki, Şmuel Din Elmasın İsraildə çıxan aparıcı ivritdilli "İsrael HaYom" qəzetində dərc olunmuş "İsraildə istehsal edilmiş, İkinci Qarabağ müharibəsində hərbi üstünlüyü təmin etmiş pilotsuz uçuş aparatları erməniləri heyrətləndirmişdi" sərlövhəli məqaləsi bu mövzuya həsr edilib.

Məqalə müəllifi qeyd edir ki, Azərbaycan Prezidenti İlham Əliyev Rusiyanın "Nasionalnaya oborona" jurnalına müsahibəsində müasir İsrail silahının İkinci Qarabağ müharibəsində əsl inqilab olduğunu vurğulayıb.

Elmas yazır ki, İkinci Qarabağ müharibəsindən sonra dəfələrlə qeyd edildiyi kimi, 44 günlük müharibə dövründə Azərbaycan Silahlı Qüvvələrində İsrail istehsalı olan pilotsuz uçuş aparatlarından səmərəli istifadə edilib və Ermənistan bu silaha cavab tapa bilməyib.

Prezident İlham Əliyev deyib: "Biz pilotsuz uçuş aparatları almağa yetərincə çoxdan, hafizəm məni aldatmırsa 10 ildən çox bundan əvvəl başlamışdıq. Bunlar İsrail istehsalı olan qırğın vasitələri idi. Biz onları mənimsədik və 2016-cı ilin aprelində qısamüddətli döyüş əməliyyatları zamanı tətbiq etdik. Bu, erməni tərəfi üçün gözlənilməz oldu. Lakin dediyim məsələyə qayıdaraq əlavə edirəm ki, biz həmin münaqişəni gərginləşdirmədik, çünki bizim genişmiqyaslı hərbi əməliyyatlar aparmaq niyyətimiz yox idi. Buna görə bu əməliyyat tez başa çatdı. Sonradan biz başqa aparatlar da almağa başladıq, yəni 2016-cı ilin aprelində biz "Harop" PUA-larından istifadə edirdik. Sonra biz İsraildə istehsal edilmiş digər pilotsuz vasitələr, konkret desək, "Sky Striker" almağa başladıq. İndi bu, heç kəs üçün sirr deyil, ona görə ki, bunu gizlətməyin mənası yoxdur. Siz dediyiniz kimi, həm kəşfiyyat, həm də döyüş təyinatlı "Orbiter" PUA-ları da aldıq. O vaxt Türkiyənin hərbi-sənaye kompleksi hələ PUA-lar istehsalına başlamamışdı. Onlar bu istehsala başlayan kimi mənim fikrimcə, biz "Bayraktar TB2"lərin ilk xarici alıcısı olduq. Bu PUA-lar da həm kəşfiyyat, həm də dəqiq zərbələr vurulması baxımından çox səmərəli olduğunu göstərdi". Onun fikrincə, pilotsuz uçuş aparatlarında döyüş şəraitində istifadə edilməsini əlaqələndirmək və sinxronlaşdırmaq zəruri idi.

Prezident İlham Əliyev deyib: "Bayraktar"lara gəldikdə, döyüş əməliyyatları zamanı onlardan bir neçəsi daim havada olurdu. Əlbəttə, bəzən hava şəraiti buna əngəl törədirdi, lakin əksər günlərdə hava aydın olduğu üçün onlar, ola bilsin kiçik fasilələrlə, praktiki olaraq hər gün işləyirdi. İsrail və Türkiyə istehsalı olan PUA-ları əlaqələndirmək və uyğunlaşdırmaq, əlbəttə, böyük ustalıq tələb edirdi. Onların hədəflərinin siyahısı da fərqli idi, çünki kəşfiyyat xarakterli döyüş sursatının məhvedici qüvvəsi "Roketsan" raketinin qüvvəsindən yüksəkdir. Buna görə də strateji, iri hədəflər "Harop" ilə, zirehli texnika və digər hədəflər isə əsasən "Bayraktar TB2"lərlə məhv edilirdi. Lakin bildiyiniz kimi, "Harop" birdəfəlik istifadə silahıdır, ona görə də biz "Harop" ilə zərbə endirəcəyimiz hədəfləri çox diqqətlə seçirdik".

Beynəlxalq münasibətlər sahəsində israilli ekspert Arye Qut "İsrael HaYom" nəşrinə müsahibəsində İsrail-Azərbaycan tərəfdaşlığından söhbət açaraq üzrə deyib: "İsrail Bakı üçün silahların fəal tədarükçüsüdür".

Arye Qut vurğulayıb: "Bu gün Azərbaycan xalqı Azərbaycanın ərazi bütövlüyü naminə canlarından keçmiş Azərbaycan əsgərlərinin və zabitlərinin ilk Anım Gününü qeyd edəcək. Onların rəşadəti və igidliyi sayəsində Azərbaycan öz torpaqlarını erməni işğalından azad edib. Prezident İlham Əliyev dəfələrlə təsdiq edib ki, İsrail ilə Azərbaycan arasında strateji tərəfdaşlıq etibarlı və hər iki tərəf üçün qarşılıqlı faydalıdır.

Bu gün İsrail-Azərbaycan münasibətləri strateji tərəfdaşlıq xarakter daşıyır, bizdə dövlətlərarası siyasi və hərbi-texniki tərəfdaşlıq ən yüksək səviyyədədir".

Milli.Az 

Məqaləyə dair fotomateriallar:

 

Şərh yaz:

0 Şərh:

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.