Nizami Gəncəvi Beynəlxalq Mərkəzi azərbaycanlı jurnalistlərin minaya düşərək həlak olmaları ilə bağlı bəyanat yayıb

Nizami Gəncəvi Beynəlxalq Mərkəzi jurnalistlərə, media mütəxəssislərinə və aidiyyəti şəxslərə silahlı qarşıdurma vəziyyətində olduğu kimi, hücumları qınayır və bu kimi təcrübələrə son qoymaq üçün bütün tərəflərə səslənir.

Milli.Az Trend-ə istinadən xəbər verir ki, bu fikirlər Nizami Gəncəvi Beynəlxalq Mərkəzinin Azərbaycan jurnalistlərinin minaya düşərək həlak olmaları ilə bağlı yaydığı bəyanatda yer alıb.

Bəyanatda qeyd olunub ki, silahlı münaqişə şəraitində mülki şəxslərin və digər qorunan şəxslərin qəsdən hədəfə alınması və beynəlxalq humanitar və insan hüquqlarının sistemli və açıq şəkildə pozulması beynəlxalq sülh və təhlükəsizlik üçün bir təhlükə ola bilər.

Kəlbəcər rayonunda minanın partlaması nəticəsində iki azərbaycanlı jurnalist və bir rəsmi həlak olub. Yük maşınının tank əleyhinə mina tərəfindən partlaması nəticəsində daha dörd nəfər yaralanıb. Azərbaycanda mina partlayışı qurbanlarının ailələrinə dərin hüznlə başsağlığı veririk.

Minaların mülki əhali üçün davamlı təhlükə yaratdığının və münaqişədən sonra bərpa işlərinə mane olduğunun qeyd edildiyi müraciətdə bildirilib: "BMT və ATƏT-in Minsk qrupu həmsədrlərini Ermənistan tərəfindən minalanmış bölgələrinin xəritələrinin təmin edilməsini asanlaşdırmağa və sürətləndirməyə çağırırıq. Bu, jurnalistlər də daxil olmaqla çoxlu sayda insanın həyatı üçün təhlükənin aradan qaldırılmasına ciddi kömək edə bilər. Bu dəstək eyni zamanda bölgədə ədalət, sülh, təhlükəsizlik və sabitliyin bərqərar olmasına böyük töhfə ola bilər".

Qeyd edək ki, bəyanatı Nizami Gəncəvi Beynəlxalq Mərkəzinin həmsədri, Dünya Bankının sabiq vitse-prezidenti İsmayıl Serageldin, Latviyanın sabiq Prezidenti Valdis Zatlers, Mavritaniyanın sabiq Prezidenti Amina Qurab-Fakim, Bolqarıstanın sabiq Prezidenti Rosen Plevneliev, Xorvatiyanın sabiq Prezidenti İvo Yosipovic, Bosniya və Herseqovinanın sabiq Baş naziri Zlatko Laqumdziya, Moldovanın sabiq Baş naziri Kirill Qaburiç, Pakistanın sabiq Baş naziri Şavkat Əziz, ISESCO-nun keçmiş baş direktoru Əbdüləziz əl-Tüveycri, Fransa Senatının üzvü Natali Qule, Nizami Gəncəvi Beynəlxalq Mərkəzinin baş katibi Rövşən Muradov imzalayıblar.

Milli.Az