Bakıda erməni cəlladlar etiraf edəcəklər - PƏRDƏARXASI

Birinci Qarabağ Müharibəsində azərbaycanlı əsirlərə işgəncə vermiş və digər cinayətlər törətmiş erməni yaraqlıları məhkəmə qarşısında çıxarılıb. Bəlli olduğu kimi,  2020-ci noyabrın 10-da Azərbaycan, Rusiya və Ermənistan arasında imzalanmış üçtərəfli bəyanatla atəşkəsin elan olunmasından sonra ölkəmiz ərazisinə qanunsuz olaraq gizli yollarla keçib Hadrut qəsəbəsində meşəlik ərazidə mövqe tutaraq hərbi qulluqçularımıza və mülki şəxslərə qarşı terror-təxribat və digər cinayət əməlləri törədən erməni silahlı dəstələri keçirilən anti-terror əməliyyatı nəticəsində tərksilah edilib. Aparılmış istintaqla müəyyən edilib ki, Ermənistan vətəndaşlarından ibarət bir qrup şəxs qanunsuz şəkildə odlu silah, onun komplekt hissələrini, döyüş sursatı, partlayıcı maddələr və qurğular əldə edərək qanunvericiliklə nəzərdə tutulmayan silahlı birləşmələr yaradıblar.

Həmin birləşmələrin üzvləri ölkə ərazisində yerləşən müəssisə, idarə, təşkilatlara, habelə ayrı-ayrı şəxslərə silahlı basqınlar etmiş, ictimai təhlükəsizliyi pozmaq, əhali arasında vahimə yaratmaq, dövlət hakimiyyət orqanları və beynəlxalq təşkilatlar tərəfindən qərar qəbul edilməsinə təsir göstərmək məqsədilə insanların həlak olması, onların sağlamlığına zərər vurulması, əhəmiyyətli əmlak ziyanının vurulması və başqa ictimai təhlükəli nəticələrin baş verməsi təhlükəsi yaradan partlayış, yanğın və digər terror əməlləri törədiblər.

Sadalanan faktlarla bağlı qanunsuz silahlı birləşmənin üzvləri Avakyan Qraç Arzumanoviç, Serobyan Geğam Samveloviç və digərlərinin, ümumilikdə 14 təqsirləndirilən şəxsin Azərbaycan Respublikası Cinayət Məcəlləsinin 214.2.1, 214.2.3-cü (terrorçuluq, qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən odlu silahdan və silah qismində istifadə olunan predmetlərdən istifadə etməklə törədildikdə), 228.3-cü (mütəşəkkil dəstə tərəfindən qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, saxlama, daşıma və gəzdirmə), 279.2-ci (qanunvericiliklə nəzərdə tutulmayan silahlı birləşmələrin və ya qrupların tərkibində müəssisələrə, idarələrə, təşkilatlara və ya ayrı-ayrı şəxslərə basqın etmə) və 318.2-ci (qabaqcadan əlbir olan bir qrup şəxs və ya mütəşəkkil dəstə tərəfindən Azərbaycan Respublikasının dövlət sərhədini qanunsuz olaraq keçmə) maddələri ilə ittiham olunmalarına dair cinayət işinin istintaqı yekunlaşdırılaraq Baş Prokurorunun müavini tərəfindən təsdiq edilmiş ittiham aktı ilə birlikdə baxılması üçün məhkəməyə göndərilib.

Maraqlıdır ki, erməni tərəfi və onun havadarları terrorçular həbs olunandan sonra həmin şəxslərin hərbi əsir kimi qələmə verilməsinə çalışdılar. Hay-həşir salaraq həmin şəxslərin dərhal azad olunması istiqamətində çirkin təbliğata başladılar. İddia edirlər ki, Azərbaycan bütün əsirlərin qeyd-şərtsiz azad olunması barədə üçtətərfli sazişi pozur. Halbuki həmin "əsirlər" dediyi şəxslər konkret cinayət əməlləri üzrə həbs olunub. Üçtərəfli saziş imzalandıqdan sonra Azərbaycan ərazisinə keçib orada təxribatçı əməllər həyata keçirməyə cəhd ediblər. Və nəticə də bəllidir.

Bu səbəbdən də Azərbaycanı nədəsə ittiham etmək sadəcə, erməni təbliğat maşınının növbəti həyasızlığından başqa bir şey deyil. Ən əsası bilməlidir ki, bu cür əsassız ittihamlarla Azərbaycana təzyiq göstərmək mümkün deyil. Azərbaycan bütün addımlarını beynəlxalq hüquq normalarına uyğun həyata keçirib və bundan sonra da belə olacaq. Ölkə ərazisinə təcavüzə yol verənləri ya məhkəmə, ya da məhv olmaq gözləyir.

Azər Nuriyev
Milli.Az