Düşməni peykdən izlədik - Azərbaycan hərb tarixinə düşdü

"Vətən Müharibəsinin çox ciddi, intensiv və şiddətli bir xarakterə malik olduğu kimsədə şübhə oyatmır. Təbii ki, bu qələbə bizim əsgərlərimizin peşəkarlığı, qəhrəmanlığı hesabına əldə olunub". 

Bunu Milli.Az-a açıqlamasında hərbi ekspert Ədalət Verdiyev deyib.

O bildirib ki, 44 günlük müharibə vaxtı peykdən alınan görüntülər hərbi əməliyyatlarımızı zənginləşdirdi:

"Bu tarixi missiyanı bizim Azərbaycan oğulları, Azərbaycan əsgəri əldə edib. Lakin müharibədə qələbə qazanmaq üçün əsgərin vətənpərvərliyi, döyüşkənliyi hər şeyi həll etmir. Əsas faktorlardan biri müasir silah və sistemlərin əldə edilməsidir ki, biz artıq neçə illərdir buna hazırlaşırdıq, silahları əldə edirdik. Lakin digər bir fakt da müharibədə tətbiq olunacaq yeni silahlı mübarizə üsullarıdır. Yəni köhnə üsulları düşmən artıq bilir, onu qavrayıb, ona qarşı tədbirləri hazırdır. Lakin yeni metodlara qarşı müharibənin gedişində əks tədbirlər formalaşdırmaq kifayət qədər çətindir. Həm də müharibə dayanıb rəqibin nə zaman fəaliyyətlərinə qarşı mübarizə metodu formalaşdıracağını gözləmir, müharibə davam edir. Bu baxımdan Azərbaycan kifayət qədər ciddi addımlar ata bildi. Biz o yeni nəsil müharibələr deyirik, həmin o yeni nəsil müharibə quru və hava qüvvələrimizin koordinasiyalı, qarşılıqlı əlaqədə fəaliyyətini tənzimləməkdən ibarət olmalıdır. Bu fəaliyyətlər həm də peykdən alınan görüntülər vasitəsilə zənginləşdirildi. Zatən yeni nəsil müharibə dedikdə bu nəzərdə tutulur. Yəni kosmik qüvvələrin, yerüstü qüvvələrin, hərbi hava qüvvələrinin, artilleriyanın, bütün bunların kompleks şəkildə tətbiqi yeni nəsil müharibənin aparıldığını ortaya qoya bilir". 

Ə.Verdiyev deyib ki, Azərbaycan Türkiyədən sonra yeni nəsil silahlardan döyüş şəraitində tətbiq edən ikinci ölkə olaraq hərb tarixinə düşdü:

"Ermənistandan Azərbaycan ərazisinə hərəkət edən bütün ehtiyyatları izləyə bilirdik. Bu bizim orbitdə yerləşən peykimizin hesabına idi. Pilotlu və pilotsuz vasitələrin qarşılıqlı əlaqəsi, daha konkret desəm pilotlu vasitənin hədəfdən 20 km aralıda raket buraxması, pilotsuz vasitənin isə həmən buraxılan raketi hədəfin istənilən nöqtəsinə sıfır yayınma ilə otuzdurması, ona çatdırması metodunu Azərbaycan çox uğurla tətbiq etdi və Türkiyədən sonra bunu döyüş şəraitində tətbiq edən ikinci ölkə olaraq Azərbaycan hərb tarixinə düşdü. Ümumiyyətlə yeniliklər çoxdur. Düşünürəm ki, bunlar araşdırılıb bir kitab halına salınıb çap edilsə daha yaxşı olar".

Təhməz Əsədov
Milli.Az