Siyasət

YAP böyük hədəflər partiyasıdır

27 Mart 2021 19:41
Baxış: 18 060

Yeni Azərbaycan Partiyasının martın 5-də keçirilən VII qurultayı həm partiyamızın, həm də ölkəmizin ictimai-siyasi həyatında mühüm hadisə kimi yadda qaldı. Qurultayın mühüm, əlamətdar cəhətlərindən biri onun Ali Baş Komandanımız cənab İlham Əliyevin rəhbərliyi ilə Azərbaycan Ordusunun 44 günlük Vətən müharibəsində möhtəşəm qələbə qazanmasından sonraya təsadüf etməsi idi.

Azərbaycan Prezidenti, Yeni Azərbaycan Partiyasının sədri İlham Əliyev qurultayda proqram xarakterli çıxışı zamanı bu məqamın üzərində geniş dayandı. Cənab Prezidnet son 17 il ərzində münaqişə ilə bağlı bütün çıxışlarında Azərbaycan xalqının heç vaxt bu işğalla barışmayacağını vurğuladığını diqqətə çatdırdı:

"Həmişə deyirdim ki, heç vaxt Azərbaycan imkan verməyəcək ki, tarixi, əzəli torpaqlarında ikinci erməni dövləti yaradılsın. Heç vaxt bizi tam qane etməyən razılaşma ilə barışmayacağıq və müharibədən əvvəl müxtəlif çıxışlarda, müsahibələrdə deyirdim ki, bizə hansısa yarımçıq sülh müqaviləsi lazım deyil. Biz ərazi bütövlüyümüzü tam bərpa etməliyik. Biz tarixi ədaləti tam bərpa etməliyik. Çünki yarımçıq razılaşma bizim xalqımızın maraqlarına cavab vermirdi, tarixi ədalətə cavab vermirdi. Yarımçıq razılaşma istər-istəməz gələcəkdə müharibə risklərini artıra bilərdi. Bizə tam, mütləq qələbə lazım idi. Biz bu mütləq qələbəni qazandıq, düşməni darmadağın etdik, düşmən ordusunu məhv etdik və istədiyimizə nail olduq".

Prezident İlham Əliyev çıxışı zamanı eyni zamanda partiyanın qurultayını zəruri edən səbəblər barədə danışdı və müharibədə qazandığımız möhtəşəm qələbənin bölgədə yeni reallıqlar yaratdığını vurğuladı. Bu yeni reallıqlar dövlətimizin, ölkəmizin, eyni zamanda hakim partiya kimi YAP-ın müasir çağırışlara cavab verməsini tələb edir, qarşımıza yeni hədəflər, yeni vəzifələr qoyur. Yeni Azərbaycan Partiyasının VII qurultayı həm də bu hədəf və vəzifələrin müəyyən edilməsi, onların xalqa, siyasi qüvvələrə, partiyamızın üzvlərinə catdırılması baxımından əlamətdar və vacib idi.

Ümumiyyətlə, yarandığı 1992-ci ildən indiyədək, Yeni Azərbaycan Partiyası böyük amallar, ali hədəflər partiyası olduğunu kifayət qədər sübut edib. 29 il əvvəl Ulu Öndər Heydər Əliyevin rəhbərliyi ilə yaradılan, 1993-cü ildə onun xalqımızın istək və tələbi ilə hakimiyyətə gəlişindən sonra hakim siyasi partiya statusunu alan YAP daim siyasi proseslərin önündə oldu, həmin mürəkkəb dövrdə ölkəni parçalanmaq təhlükəsi, xaos, hərc-mərclikdən xilas etdi, enerji layihələrinin işə salınmasını, dövlətimizin həm siyasi, həm də iqtisadi sahədə böyük inkişaf yoluna qədəm qoymasını təmin etdi. 2003-cü ildən isə sabitlik, iqtisadi inkişaf və qələbəyə hesablanan bu kurs Prezident İlham Əliyev tərəfindən uğurla davam etdirildi. Bu baxımdan Cənab Prezidentin qurultayda vurğuladığı aşağıdakı fikirlər çox yerinə düşür:

"Biz bütün işləri ardıcıllıqla edirik və əgər son 17 illik tariximizə nəzər salsaq görərik ki, qarşıya hədəflər qoyulurdu, hədəflər düzgün müəyyən edilirdi, biz bu hədəflərə çatırdıq və ondan sonra qarşımıza yeni hədəfləri qoyurduq. Beləliklə, həm siyasi, həm iqtisadi sahədə dayanıqlı inkişafı təmin etdik, beynəlxalq aləmdə Azərbaycanı çox böyük nüfuza və hörmətə malik olan ölkəyə çevirdik və əsas məsələmizi - ərazi bütövlüyümüzün bərpasını təmin etdik".

Beləliklə, YAP-ın son qurultayı həm ölkəmizin, həm də hakim siyasi təşkilat kimi, YAP-ın həyatında böyük bir tarixi mərhələyə yekun vurdu. Yeni, məsuliyyətli növbəti mərhələnin başlanğıcını qoydu. Hakim partiya yeni mərhələyə həm struktur dəyişiklikləri, həm kadr potensialının yenilənməsi, gəns kadrların rəhbər strukturlara cəlb edilməsi, daha çevik və effektiv idarəetmə sisteminin təmin olunması ilə qədəm qoydu.

Xüsusi olaraq qeyd etmək istəyirəm ki, Azərbaycanın Birinci vitse-prezidenti Mehriban xanım Əliyeva YAP Sədrinin I müavini təyin olundu. Mehriban xanımın partiyamızın Sədrinin birinci müavini kimi fəaliyyəti YAP-ın nüfuzunun və gücünün, Yeni Azərbaycan Partiyasına ictimai dəstəyin daha da artması baxımından olduqca mühüm əhəmiyyətə malikdir.

Prezident İlham Əliyevin başlatdığı yeni islahatlar dalğasında gənclər yenə də prosesin mərkəzindədirlər. Qurultayda bu istiqamətdə də vacib qərarlar qəbul olundu, Belə ki, YAP-ın yeni formalaşan İdarə Heyətində kifayət qədər gənc təmsil olundu.

Eyni zamanda qurultayda YAP-ın öz ənənələrinə, varislik prinsipinə sadiq oluğu da qəbul olunan qərarlarla bir daha təsdiqini tapdı. YAP-ın Veteranlar Şurası yaradıldı. Prezident İlham Əliyev gənclərin təcrübəli nəslin fəaliyyətindən faydalanmasının vacibliyini vurğuladı və bu baxımdan Yeni Azərbaycan Partiyasında Veteranlar Şurası yaradılmasının çox önəmli addım olduğunu qeyd etdi.

Qurultayda yaddaqalan məqalardan biri də siyasi islahatlar, siyasi mühitin sağlamlaşdırılması, ölkədəki sağlam siyasi qüvvələr arasında inteqrasiyanın, dialoqun daha də dərinləşdirilməsi ilə bağlı idi. YAP-ın qarşıdakı dövr üçün prioritetləri sırasında bu məsələ də xüsusi yer aldı.

Bütövlükdə, YAP-ın qarşıdakı dövr üçün prioritetləri arasında dövlət müstəqilliyinin möhkəmləndirilməsi, müstəqillik dövrü tariximizin obyektiv öyrənilməsi, gənc nəslin vətənpərvərlik ruhunda tərbiyə edilməsi, Böyük Qayıdış proqramının reallaşdırılması, ordumuzun daha da gücləndirilməsi, bütün sahələrdə islahatların dərinləşdirilməsi və s. kimi dövlətimiz üçün həyati vacib məsələlər yer aldı. Cənab İlham Əliyev partiyanın üzvləri və fəalları qarşısında yaranan yeni reallıqlardan irəli gələn vəzifələr qoydu və bu vəzifələrə uyğun olaraq,YAP fəalları bundan sonra da şəhid ailələrinə və qazilərə böyük dəstək olacaqlar, onlara hər cür xidməti, o cümlədən yüksək səviyyədə tibbi xidməti göstərəcəklər.

Hesab edirəm ki, indiyə qədər olduğu kimi, yeni mərhələdə də partiyamız fəaliyyətini müasir dövrün tələblərinə uyğun quracaq, daha böyük ugurlar qazanacaq.

Fürsətdən istifadə edib dövlətimizin başçısı, Yeni Azərbaycan Partiyasının sədri cənab İlham Əliyevə bizə göstərilən etimada görə dərin təşəkkürümüzü bildirir və qeyd etmək istəyirəm ki, bu məsuliyyətli etimadı layiqincə doğrultmağa çalışacağıq.

Tofiq Cahangirov

Akademik C.Abdullayev adına Elmi-Tədqiqat Kardiologiya İnstitutunun şöbə rəhbəri,  YAP İdarə Heyətinin üzvü, professor

 

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.

Global site tag (gtag.js) - Google Analytics