Dünyanın ən bahalı milli komanda məşqçiləri nə qədər qazanırlar?

Milli komandada işləmək, hətta dünyanın ən məşhur məşqçiləri üçün belə, gəlirin əhəmiyyətli dərəcədə azalması demək deyil. 

Milli.Az-ın xəbərinə görə, Almaniyanın BILD nəşri milli komanda məşqçilərinin cari maaş proqnozlarını dərc edib və Karlo Ançelotti böyük fərqlə birinci yeri tutub.

Braziliya milli komandası ilə müqaviləsini 2030-cu ilə qədər uzadan italyan mütəxəssisin ildə təxminən 10 milyon avro qazandığı bildirilir. Onun müqaviləsi hazırkı milli komanda məşqçiləri arasında ən bahalıdır.

Yurgen Klopp ikinci yerdədir. Almaniya milli komandasındakı işinə görə "Liverpul"un keçmiş məşqçisi ildə təxminən 7 milyon avro qazanır. Bu, onun klub səviyyəsində və "Red Bull"da işlədiyi müddətdə qazandığından azdır, lakin Klopp Almaniya milli komandasının tarixində ən çox qazanan məşqçisidir.

ABŞ millisinin məşqçisi Maurisio Poçettino 6,8 milyon avro ilə üçüncü yerdədir. Sonrakı yerdə təxminən 6 milyon avro maaşla İngiltərənin baş məşqçisi Tomas Tuxel, İspaniya millisi ilə Dünya çempionatının qalibi Luis de la Fuente isə illik 5 milyon avro ilə ilk beşliyi tamamlayır.

Portuqaliyalı məşqçi Jorje Jesus illik maaşı təxminən 4 milyon avro ilə altıncı yerdədir. Maraqlıdır ki, Portuqaliya mediası federasiyanın məşqçi və onun heyəti üçün ümumi illik xərclərinin təxminən 4,5 milyon avro olduğunu bildirib.

Zinəddin Zidan ildə 3,6 milyon avro və ya ayda 300 min avro qazancı ilə  yalnız yeddinci yeri tutub. Fransız mütəxəssis baza maaşını sələfi Didye Deşamın səviyyəsində saxlayıb və hətta imic hüquqları üçün ayrıca ödənişdən imtina edib. Bunun əvəzinə, milli komandanın Avropa və Dünya çempionatlarındakı uğurları üçün daha yüksək bonuslar barədə danışıqlar aparıb. 

İlk onluğa Hollandiyanın məşqçisi Xavi Hernandes (3 milyon avro), Argentina millisinin məşqçisi Lionel Skaloni (2,3 milyon avro) və Avstriyanın baş məşqçisi Ralf Ranqnik (2 milyon avro) də daxil olub. (lent.az)

Müəllif: Ülkər Vəliyeva (Milli.Az redaktor)