Siyasət

"Qiyam olarsa, atəş açılacaq" - Paşinyan xəbərdarlıq etdi

22 Fevral 2021 16:21

Baxış: 2 234

#ERMƏNİSTAN

"Müxalifət üsyan, qiyam və ya çevriliş yolu ilə hakimiyyəti dərhal ələ almağa hazırlaşmağa çalışır. Lakin onlar bilməlidir ki, dövlət vətəndaşlarını və dövlət obyektlərini qorumağa hazırdır".

Ermənistan parlamentinin müdafiə və təhlükəsizlik məsələləri üzrə daimi komissiyasının sədri Andranik Köçəryan "Azadlıq" radiostansiyasının erməni xidmətinə verdiyi müsahibəsində belə deyib.

"Kimsə unutmamalıdır ki, dövlət insanlara atəş açmaqla bağlı inhisarçı hüquqa malikdir. Buna görə də kimsə dövləti hədələmək, çevriliş və ya qiyam yolu ilə hakimiyyəti devirmək fikrinə düşməsin. Hər əməlin qanun çərçivəsində cəzası var", - A.Köçəryan deyib.

Xatırladaq ki, A.Köçəryan 2008-ci ilin martın 1-də İrəvanda dinc nümayişçilərin gülləbaran edilməsi faktlarını araşdıran müstəqil komissiyanın rəhbəri olub. Prezident seçkilərinin nəticələrinin total şəkildə saxtalaşdırılmasına və Serj Sarqsyanın "qələbə"sinə etiraz edən erməniləri polislərlə hərbçilər atəşə tutmuş, sonucda 10 nəfər həlak olmuşdu.

Ermənistanın sabiq prezidenti Robert Köçəryan məhz həmin olaylara görə məhkəməyə cəlb olunub.

Andranik Köçəryanın açıqlaması erməni müxalifətinə xəbərdarlıq olmaqla yanaşı, Ermənistan rəhbərliyinin son vaxtlar "xalq etirazları" kimi qələmə verilən aksiyaların gerçək ssenari müəlliflərinə və təşkilatçılarına da messic kimi qəbul edilə bilər.

Baş nazir Nikol Paşinyan və ətrafı artıq anlayırlar ki, İrəvandakı etirazları kənardan idarə edənlər kimlərdir, onlar qarşılarına hansı məqsədlər qoyublar və məramları nədir.

Məhz bu səbəbdən İrəvan iqtidarı müxalifətlə "demokratiya" oyunundan əl çəkərək, sərt davranışa keçməyə qərar verib.

Orxan Hun
Milli.Az