Siyasət

"Rus qoşunları çəkilsə, Türkiyə əsgərləri 2 saata İrəvandadır" - bir "plan"ın izi ilə - DETALLAR

3 Dekabr 2019 12:45
8 Şərh     Baxış: 5 116

Türkiyənin Ermənistana qarşı "Altay" kod adlı genişmiqyaslı hərbi əməliyyat aparmaq planlarının mövcudluğu barədə İsveçdəki "Nordic Monitor" saytının yaydığı məlumatı Ermənistanda böyük təşviş yaradıb.

Belə ki, Ermənistanın XİN başçısı Zöhrab Mnasakanyan İrəvanda iordaniyalı həmkarı ilə birlikdə keçirdiyi mətbuat konfransında Türkiyənin Ermənistana ehtimal olunan zərbələrindən bəhs edib.

"Dərc olunmuş bu xəbəri nə təsdiq, nə də təkzib edə bilmərəm. Əgər məsələ belədirsə, ilk əvvəl Türkiyə tərəfi buna cavab verməlidir. Lakin türklərdən hələ də reaksiya yoxdur", - Z.Mnasakanyan deyib.

Onun sözlərinə görə, məsələ ciddi narahatlıq doğurur və bu səbəbdən Ermənistan prosesi diqqətlə izləyir.

Ermənistanın Müdafiə Nazirliyi və digər güc strukturları İsveçdəki "Nordic Monitor"un dərc etdiyi məxfi materialları araşdırmaqla məşğuldur. Həmin materiallara görə, Türkiyənin Silahlı Qüvvələrinin rəhbərliyinin Ermənistana aviazərbələr endirmək planları var.

Hətta o da vurğulanır ki, "Rusiya qoşunları Ermənistandan çıxarılarsa, türk əsgərləri 2 saata İrəvanda olacaqlar".

Xatırladaq ki, "Nordic Monitor" Türkiyə Silahlı Qüvvələrinin Baş Qərargahının 23 may 2016-cı il tarixli daxili yazışması iddia olunan sənədin surətini dərc edib. Məlumata görə, Türkiyənin Hərbi-Hava Qüvvələri kod adı "Oğuztürk" olan əməliyyat çərçivəsində Ermənistana hava zərbələri endirməyi planlaşdırılır. Plan 2011-ci ilin iyulunda təsdiqlənib.

Sözügedən planın "çatışmayan səhifələri"ni dərc edən "Nordic Monitor" iddia edir ki, həmin itki 2016-cı ilin mayında, Ankara yaxınlığındakı "Akıncı" aviabazasında sənədlərin yoxlanması zamanı aşkarlanıb.

"Səhifələrin itməsi plana təsir etməyib və o, hələ də qüvvədədir", - "Nordic Monitor" yazıb.

Bütün bunlar gerçəkdirmi?

Yox.

Milli.Az-ın əldə etdiyi məlumatlara görə, "Nordic Monitor" saytı İsveçin paytaxtı Stokholmda yerləşən "Nordic Research and Monitoring Network"a məxsusdur.

Bu qədər gurultulu adı olan "şəbəkə", əslində, üç nəfərdən ibarətdir.

Onlar türk jurnalistlər Abdulla Bozkurt və Levent Kenez, habelə ATƏT-in sabiq eksperti, əvvəllər Türkiyə DİN-i ilə çox sıx əməkdaşlıq etmiş Murat Çetinerdir.

"Nordic Monitor" saydı Türkiyə prezidenti Rəcəb Tayyib Ərdoğana qarşı əks-təbliğat, böhtan və qarayaxma kampaniyası ilə məşğuldur. "Məxfi sənədlərin skrinşotlarını və skanları"nı dərc edən bu sayt faktiki olaraq Ankaranı hədəf alır.

Məqsədlərdən biri də Türkiyənin Rusiya ilə münasibətlərini korlamaq, habelə Suriya, Yunanıstan və İranda Türkiyəyə qarşı aşkar nifrət yaratmaqdır.

Məsələn, noyabrın 24-də "Nordic Monitor" guya Türkiyə xüsusi xidmət orqanlarının sabiq mayoru Erkan Akın adlı şəxsin məruzəsini dərc etmişdi. Sən demə, NATO komissiyası üçün hazırlandığı iddia olunan "məruzə"də Türkiyə HHQ-nin 2015-ci ilin noyabrın 24-də Rusiyanın Su-24 təyyarəsinə hücumundan bəhs olunur.

Məruzədə vurğulanır: "Rusiya təyyarəsinin vurulması əmrini şəxsən Rəcəb Tayyib Ərdroğan verib. Məhz o demişdi: "Suriya-Türkiyə sərhədini keçərək Türkiyəyə sızan, ciddi risk və təhlükə kəsb edən istənilən element hərbi təhdid kimi dəyərləndirməli, hərbi hədəf sayılmalıdır".

Ərdoğan bu sözləri deyib, amma Türkiyə prezidenti Suriyanın şimalındakı terrorçu PYD və YPG qruplaşmalarını nəzərdə tuturdu.

Lakin "Nordic Monitor" Türkiyənin dövlət başçısının sözlərini kontekstdən çıxararaq Rusiya təyyarələrini vurmaq əmri kimi təqdim edib.

"Akının məruzəsi"ndə bir neçə "sxem", habelə insident zamanı Rusiya təyyarələrinin və Türkiyənin hava patrulunun hərəkət xəritələri də var.

Belə "məruzə"nin NATO yetkililərinə təqdim edilməsi mümkünsüzdür, absurddur.

"Məruzə" bir qədər köhnə dəbli, primitiv olsa da, ustalıqla hazırlanmış əks-təbliğatdır və aşkar provokasiyadır.

Noyabrın 9-da isə "Nordic Monitor" saytı "Su-24 təyyarəsi vurulandan sonra Rusiyə Ərdoğanın prezident iqamətgahını bombalamağı planlaşdırırdı" adlı "araşdırma" da dərc etmişdi.

Az tanınan "Nordic Monitor" saytındakı bu "məlumat"lara əhəmiyyət verməmək də olardı. Fəqət, sözügedən saytın Qərbin bəlli ölkələrinin xüsusi xidmət orqanlarından göstərişlər alaraq davrandığı şübhə doğurmadığından, "Nordic Monitor" faktiki olaraq, sadəcə, Türkiyəni yox, Rusiyanı da hədəfə alıb.

"Nordic Monitor"un dərc etdiyi "materiallar"a baxmaq saytın məqsədlərini anlamağa yetər.

"Türkiyə Somalidəki "Əş Şəbab" terrorçularına 600 min dollar verdi", "Türkiyə Yunanıstanı vurmağa hazırlaşır", "Türkiyə İrana qarşı genişmiqyaslı təxribat hazırlayır", "Türkiyə Misirə və Səudiyyə Ərəbistanına qarşı yeni kəşfiyyat əməliyyatları hazırlayır" və s.

"Nordic Monitor"un rəhbəri və əsas yazarı Abdulla Bozkurt əvvələr "Today's Zaman" qəzetinin Ankara bürosunun rəhbəri, "Nurçuluq" qruplaşmasının lideri Fətulla Gülənin "ən sevimli" jurnalistlərindən biri idi.

A.Bozkurt hazırda "nurçular"ın Avropadakı "Hizmet" şəbəkəsinin İsveçdəki rəhbərlərindən biridir. Yəni FETÖ terror təşkilatının bilavasitə funksioneridir.

"Nordic Monitor"un digər iki üzvü də "nurçu"lardır və bunu gizlətmirlər.

Belədirsə, "Nordic Monitor"un məram, qayə və məqsədləri bəlli olmurmu?!

Elçin Alıoğlu
Milli.Az

Şərh yaz:

8 Şərh:

  • Anonim
    MEHMAN QAZAXLI · 3 Dekabr 13:2930

    RUSİYA QOŞUNLARI ERMƏNİSTANDAN CƏKİLSƏ DAHA YAXŞI OLAR.ERMƏNİSTANIN AZƏRBAYCAN TORPAQLARINI İŞĞAL ETMƏSİ DAYANAR. ERMƏNİSTAN HEGEMONLUĞÜ İŞĞALCILIĞI RUSİYAYA GÜVƏNƏRƏK RUS SİLAHINDAN RUSİYANIN GÜCÜNDƏN İSTİFADƏ EDƏRƏK TORPAQLARIMIZI İŞĞAL ETDİ.İNDİ İSƏ ELƏ BİL ERMƏNİYƏ YOL ÖYRƏDİRİK GƏL RUSUN ƏTƏYİNİ BURAXMA YOXSA MƏHV OLARSAN CƏHƏNNƏMƏ KİMİ GETSİN --REGİONDA RUSİYA İLƏ ƏN YAXIN BİZ DOST QARDAŞ OLMALIYIQ QARABAĞIMIZI XİLAS ETMƏK ÜCÜN CÜNKİ BU BƏLANIN ACARI RUSUN ƏLİNDƏDİR YÜZƏ YÜZ.RUS AYAĞINI BİR ADDIM ERMƏNİSTANDAN GERİ CƏKSƏ ERMƏNİ QACA- QACA GƏLİB AZƏRBAYCANA YALVARACAQ Kİ GƏL SÜLH EDƏK RAZILAŞAQ MEHRİBAN YAŞAYAQ ---RUSİYA ERMƏNİSTANDAN CƏKİLSƏ YAXŞIDIR QOY ARALARI DƏYSİN HƏMİN GÜN QARABAĞ MƏSƏLƏSİ HƏLL OLACAQ.

    Cavab yaz
  • Anonim
    Men · 3 Dekabr 17:4500

    Teze xeber deyil ki, bu adi vetendawda bilir ki rus cekilse, Qarabag bizdedir. Ermeniye rusdan möhkem yapisib. Turkiye suriyani qoruyub esgerini ora tökmekdense, Turkiyede kef eden suriyalilari göndermeli idi, gedib torpaqlarini qorusun. Turk esgeri gedib onun bunun torpaginda sehid olmamali idi. Suriyalilar kef edir Turkiyede.

    Cavab yaz
  • Anonim
    Goo · 3 Dekabr 18:5400

    Sonra ermenistan ABS a goz qas edecek.Teze partnyor tapacaq.

    Cavab yaz
  • Anonim
    Oxucu · 4 Dekabr 02:3530

    Erməni qucaq millətidir Rusiyanın qucağından düşüb ya avropanın ya ABŞ in ya da ki ən pis halda iranın qucağında oturacaq.

    Cavab yaz
  • Anonim
    Alimardan · 4 Dekabr 09:0700

    bu şərt oxsadi xalanin dayi olmasi ucun olan şərtə.

    Cavab yaz
  • Anonim
    e · 4 Dekabr 11:5100

    sadece ermenileri qorxumaq ucun uydurulmus yalandi.sebebide rus qosunlari ermenistandan cixmasin deye

    Cavab yaz
  • Anonim
    Ağsaqqal · 4 Dekabr 22:2410

    Rusiya qoşunları ermənistandan çəkilsə ,ermənilər heç kimsiz qarabağı göydə tərk edərlər !Təəssüflər olsunki ,bu məsələ hələlik mümkün olan məsələ də deyil !

    Cavab yaz
  • Anonim
    fakt · 5 Dekabr 11:0900

    ne rus ne amerkan nedeki turkler torpaq alaib bize veren deyil.cunki bu torpaq onlarin deyil bizim ana torpaqimizdir.bu meseleni ozumuz hell etmeliyik.bir yol var oda muharibe yoludur.besdi ozumuzu aldatdiq.

    Cavab yaz

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.