Siyasət

Razi Nurullayev: "Milli Şura seçki qərargahını bu həftə yaratmasa, bu, gələcəkdə kifayət qədər fəsadlar törədəcək"

31 İyul 2013 12:27

Baxış: 718

#RUSSİA #RAZİ PHARMACUTİCAL GLASS

"Milli Şuranın Rusiya prezidentinə müraciətində qəbahət yoxdur"

"Rüstəm İbrahimbəyovun Azərbaycana qayıtması Milli Şuranın qarşısına qoyduğu məqsədlərin ziyanına işləyirsə və bu əsaslandırılırsa, burada məntiq var. Buna görə də Rüstəm İbrahimbəyovu çox az müddət gözləmək lazım gələcək və bu müddətdən sonra o Azərbaycana qayıdacaq".

Bu açıqlamanı APA-ya Milli Şuranın üzvü, Azərbaycan Xalq Cəbhəsi Partiyasının (AXCP) sədr müavini Razi Nurullayev verib.

Onun sözlərinə görə, Milli Şura ilə bağlı proseslərin gecikməsi və seçki qərargahının formalaşdırılması Rüstəm İbrahimbəyovun özündən asılı olan məsələ deyil: "Bu, Milli Şuranın və onun üzvlərinin məsuliyyətidir. Milli Şurada idarəedici bir qurumun olmaması və bu məsələlərin müzakirə edilməməsi Milli Şuranın seçki qərargahı yaratması və onunla bağlı digər prosesləri ləngidir. Əgər seçki qərargahı bu həftə formalaşmasa, bu gələcəkdə kifayət qədər fəsadların yaranmasına gətirib çıxaracaq".

R. Nurullayev Milli Şuranın R. İbrahimbəyovun Rusiya vətəndaşlığından çıxarılması ilə bağlı Rusiya prezidenti Vladimir Putinə müraciətinə də münasibət bildirib. O qeyd edib ki, Milli Şura demokratik bir qurum kimi, xarici siyasətində fərdlərə və dövlətlərə fərqli münasibət bəsləmək niyyətində deyil: "Bu baxımdan Rusiyanın prezidenti, xalqı da Milli Şurada olan təmsilçilərin düşməni deyil. Ona görə də Milli Şuranın Rusiya prezidentinə müraciətində bir qəbahət yoxdur. Ümumiyyətlə Azərbaycan ənənəvi müxalifəti heç vaxt Rusiya meylli deyil, əksinə Qərb meylli olub və həmişə Rusiyanı Azərbaycanın daxili işlərinə qarışmaqda rol aldığını qeyd edib".

Milli.Az