San-Marino mətbuatı Azərbaycandan birbaşa qaz tədarükünün əhəmiyyətini vurğulayıb

San-Marinonun rəsmi qəzeti "Tribuna Politica" SOCAR Trading Gas & Power ilə imzalanmış Azərbaycandan təbii qazın birbaşa tədarükünə dair sazişin əhəmiyyətini geniş şəkildə işıqlandıraraq, bu müqaviləni ölkənin enerji sabitliyinin təmin olunması istiqamətində ən mühüm addımlardan biri kimi qiymətləndirib.

Milli.Az Trend-ə istinadən xəbər verir ki, nəşrdə qeyd olunub ki, sənədin Bakı Enerji Həftəsi çərçivəsində SOCAR-ın prezidenti Rövşən Nəcəf və dövlət şirkəti A.A.S.S.-in baş direktoru Marçello Forsellini tərəfindən imzalanması respublikanın resursların idarə olunması sahəsində yeni mərhələyə keçidini təmin edir.

Qəzetin jurnalistləri vurğulayırlar ki, təsdiqlənmiş təchizat modeli ölkəni geosiyasi risklərdən maksimum dərəcədə qorumağa və qış mövsümündə fasiləsiz istilik təchizatını təmin etməyə hesablanıb.

Müvafiq nazirliklər daxili istehlak tariflərinin sabitləşdirilməsi və dövlət büdcəsinin daha proqnozlaşdırılan parametrlər əsasında formalaşdırılması məqsədilə mənbədən birbaşa alış mexanizmindən istifadə etməyi planlaşdırırlar.

"Tribuna Politica"nın yazdığına görə, yeni saziş Azərbaycan və San-Marino arasında qarşılıqlı investisiyaların cəlb olunması, eləcə də birgə texnoloji innovasiyaların inkişafı üçün uzunmüddətli əsas yaradır.

"Bu saziş enerji təchizatının sabitliyini və təhlükəsizliyini gücləndirmək məqsədilə tədarük mənbələrinin şaxələndirilməsinə xidmət edən diplomatik fəaliyyətin konkret nəticəsidir. Eyni zamanda, bu, iki ölkə arasında gələcək enerji əməkdaşlığı istiqamətində atılmış real addımdır", - deyə nəşr San-Marinonun iqtisadi planlaşdırma üzrə dövlət katibi Alessandro Bevitorinin bəyanatından sitat gətirib.

Maliyyə, büdcə, nəqliyyat və energetika məsələləri üzrə dövlət katibi Marko Qatti isə qəzetə açıqlamasında yeni idxal modelinin iqtisadi üstünlüklərinə diqqət çəkib.

"Aparıcı beynəlxalq oyunçuya birbaşa çıxış imkanının əldə olunması xüsusi strateji əhəmiyyət daşıyır. Əlverişli iqtisadi şərtlərin müəyyənləşdirilməsi ölkə üçün real iqtisadi üstünlük yaradır, çünki bu, xərclərin daha dəqiq proqnozlaşdırılmasına və tarifsistemimizin daha səmərəli idarə olunmasına imkan verir", - deyə Qatti bildirib.

Milli.Az