Siyasət

Azərbaycan COP29 çərçivəsində iqlim problemlərinin həllində əməkdaşlıq ruhunu gücləndirmək üçün hər cür səy göstərəcək - XİN rəhbəri

29 Sentyabr 2024 08:00

Baxış: 239

#BMT #XARİCİ İŞLƏR NAZİRLİYİ

Azərbaycan COP29 çərçivəsində iqlim problemlərinin həllində əməkdaşlıq ruhunu gücləndirmək üçün hər cür səy göstərəcək.

Milli.Az Trend-ə istinadən xəbər verir ki, bu barədə Azərbaycanın xarici işlər naziri Ceyhun Bayramov BMT Baş Assambleyasının 16-cı plenar iclasında çıxışı zamanı deyib.

"Dünyada artan fikir ayrılıqları bizi əsrin ən böyük transmilli çağırışı olan iqlim dəyişikliyi ilə təcili mübarizə zərurətindən yayındırmamalıdır. İndiyə qədər görülən işlər qlobal temperatur artımını 1,5 dərəcə Selsi ilə məhdudlaşdırmaq üçün hələ də kifayət deyil. Gələcək naminə, davamlı inkişafa dair qlobal vizyona dair öhdəliklərimizi həyata keçirmək üçün təcili, birgə və davamlı səylər göstərməyin vaxtıdır. 2024-cü ilin noyabrında Azərbaycanda BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası milli səviyyədə keçiriləcək. Azərbaycan yaşıl dünya naminə həmrəylik çağırışını rəhbər tutaraq, ümumi öhdəlik və mənəvi borc kimi inkişaf etmiş və inkişaf etməkdə olan ölkələri bir-birinə yaxınlaşdırmaq və iqlim problemlərinin həlli üçün əməkdaşlıq ruhunu gücləndirmək üçün hər cür səy göstərəcək".

Nazir qeyd edib ki, yeni sədr kimi Azərbaycan COP29-un şəffaf, qərəzsiz, əhatəli və bütün tərəflərin maraqlarını nəzərə almaqla keçirilməsinə sadiqliyini bir daha təsdiqləyir:

"COP29-a ev sahibliyi etmək və builki konfransa sədrlik etməkdə beynəlxalq ictimaiyyətin bizə göstərdiyi etimad Azərbaycanın iqlim gündəliyinə rəhbərlik etməyə və iqlim dəyişikliyi ilə qlobal mübarizəyə töhfə verməyə hazır olduğunun sübutu və etirafıdır".

Milli.Az
Xəbərlərimizi WhatsApp kanalımızdan da oxuyun