Siyasət

Azərbaycan-Tacikistan münasibətlərində yeni səhifə açılır

23 May 2024 10:44
Baxış: 792

Ötən gün Tacikistan Respublikasının Prezidenti Emoməli Rəhmon Azərbaycana gəlib. Heydər Əliyev Beynəlxalq Aeroportunda ali qonağın şərəfinə fəxri qarovul dəstəsi düzülüb, onu Azərbaycan Respublikası Baş nazirinin birinci müavini Yaqub Eyyubov, xarici işlər nazirinin müavini Samir Şərifov və digər rəsmi şəxslər qarşılayıb. Bugün İlham Əliyev Emoməli Rəhmon ilə görüşüb. Onlar mətbuata birgə bəyanatla çıxış edəcəklər.

Çindən Avropaya gedən ən qısa və təhlükəsiz tranzit daşımaların məhz Azərbaycanın ərazisindən həyata keçirilməsi ölkəmizə marağı getdikcə artırır. Xüsusilə, tarixi qələbəmizdən sonra Azərbaycanın nəqliyyat-logistika imkanlarının genişlənməsi, Zəngəzur dəhlizinin reallaşdırılması məsələsi ölkəmizi Şərqlə Qərb arasında mühüm nəqliyyat qovşağına çevirib. Bu baxımdan Mərkəzi Asiya ölkələri Azərbaycanla əlaqələrin dərinləşməsində maraqlıdır.

Prezident İlham Əliyevin son 2-3 il ərzində Mərkəzi Asiya, o cümlədən regionun türkdilli ölkələrinə ardıcıl səfərləri diqqət çəkir. Bu səfərlər deməyə əsas verir ki, əlaqələrimiz genişlənir, dərinləşir və strateji xarakter alır.

Ümumiyyətlə, Azərbaycan Respublikasının uğurlu xarici siyasətində Mərkəzi Asiya ölkələri ilə münasibətlərin xüsusi yeri var. Bu ölkələr sırasında Tacikistan ilə münasibətlər özünəməxsus rol oynayır.

Azərbaycan-Tacikistan əlaqələrinin tarixinə qısa nəzər salsaq görərik ki, münasibətlər heç də yeni deyil. İki ölkə arasında diplomatik münasibətlər 1992-ci il mayın 29-da qurulub. 2007-ci ildə Azərbaycanın Tacikistanda, bir il sonra isə Tacikistanın Azərbaycanda səfirliyi fəaliyyətə başlayıb.

İlham Əliyevin və Tacikistan Prezidenti Emoməli Rəhmon ilə şəxsi dostluq münasibətləri də ölkələrimiz arasında əlaqələrin inkişafına müsbət təsir edir. Prezident İlham Əliyev Tacikistana indiyədək altı dəfə səfər edib. Ötən il dövlətlərimiz arasında ali səfərlər baxımından olduqca məhsuldar il olub. Azərbaycan Prezidenti 2023-cü ildə dost ölkədə iki dəfə səfərdə olub. Dövlətimizin başçısı 2023-cü il aprelin 5-6-da Tacikistana dövlət səfəri edib. Prezident İlham Əliyev ötən il sentyabrın 14-də Mərkəzi Asiya dövlət başçılarının Məşvərət Şurasının Düşənbədə keçirilən iclasında Prezident Emoməli Rəhmonun dəvəti ilə yeganə fəxri qonaq qismində iştirak edib. Tacikistan Prezidenti Emoməli Rəhmon isə ötən il noyabrın 24-də BMT-nin Mərkəzi Asiya Ölkələrinin İqtisadiyyatları üçün Xüsusi Proqramının - SPECA-nın iştirakçı ölkələrinin dövlət və hökumət başçılarının Zirvə görüşündə iştirak etmək üçün ölkəmizdə səfərdə olub.

Bugünkü səfər də əlaqələrin dərinləşməsinə, inkişafa yönəlib. Münasibətlərin genişlənməsində yeni səhifə açacaq bu səfər bir sıra sahələrdə əməkdaşlığın gücləndirilməsinə töhfə verəcək. Səfər çərçivəsində imzalanacaq sənədlər ölkələrimiz arasında əməkdaşlığın dərinləşdirilməsi üçün hüquqi bazanı daha da möhkəmləndirəcək.

İslam
Milli.Az

 

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.