Siyasət

Paşinyan sülh dilini anlamır, erməniləri fəlakətə sürükləyir

15 Mart 2023 11:18
Baxış: 1 518

Ermənistanın baş naziri Nikol Paşinyanın dünən İrəvanda keçirdiyi mətbuat konfransı qonşu ölkənin hakimiyyət dairələrinin normal və konstruktiv siyasəti yox, qarşıdurmanı seçdiyinə dəlalət edir. Paşinyanın açıqlamaları yekun sülh sazişinə aparan yolu daha da uzadır, Ermənistanın yeni silahlı təxribatlara əl atacağının anonsu kimi səslənir. Bu isə İrəvan üçün ağır nəticələr verəcək.

Adətinə xilaf çıxan Paşinyan bu dəfə mətbuat konfrası keçiriləcəyi barədə administrasiyasının ilkin açıqlamaları, komandasının mənsublarının hazırlıq bəyanatları olmadan "qəfil" tədbirə əl atdı. O, həmişəki ampluasına sadiq qalaraq yenə mahiyyətlə məzmunu, forma ilə formatı, ağla qaranı qarışdırdı və yalanı gerçək, gerçəyi də iddialar qismində qələmə verməyə çalışdı.

Söz oyunlarından geniş istifadə edən Nikol Paşinyan bu dəfə "innovasiya"lar edərək Rusiya Federasiyasını suçladı, Moskvaya ünvanlanmış ultimatumlar səsləndirdi və az qala açıq şəkildə bəyan etdi ki, Fransanın iştirakı olmadan hansısa sənəd imzalamaq niyyətində deyil.

Ermənistanın baş naziri Azərbaycanla aparılan danışıqlar prosesində çox ciddi problemlər yarada biləcək açıqlamalar da verib. Rusiya Sülhməramlı Kontingentinin (RSK) müvəqqəti operativ nəzarətində olan ərazilərdə yaşayan ermənilərin nümayəndələri ilə martın 1-də Xocalıdakı görüşdən sonra prosesi davam etdirmək üçün rəsmi Bakı yeni görüş təklif etdi.

Amma qarabağlı ermənilərin separatçı liderləri görüşdən imtina edərək yenə də "müstəqillik", "milli müqəddəratı təyin etmə hüququ" və s. kimi absurd şüarçılığa vardılar.

Həmin ifadələri Paşinyan da mətbuat konfrasında faktiki olaraq təkrarladı. Bu isə Ermənistanın ölkəmizin sərhəd toxunulmazlığı, ərazi bütövlüyü və suverenliyini şübhə altına alması deməkdir. Üstəlik, Paşinyanın dünənki bəyanatları qarabağlı erməni separatçılarının açıqlamalarının az qala sözbəsöz təkrarıdır. Bu isə Xankəndindəki separatçı rejimin ritorikasının İrəvandan idarə olunan proses olduğunu göstərir.

"Biz həmişə demişik ki, Dağlıq Qarabağ xalqının hüquqları və təhlükəsizliyi məsələsi bizim üçün fövqəladə dərəcədə mühüm məsələ, əsas məqsədlərimizdən biridir. Hesab edirik ki, bu məsələnin həllində əsas mandat məhz Dağlıq Qarabağda olmalıdır, əsas dialoqu da onlar Bakı ilə aparmalıdır", - Paşinyan bildirib.

Halbuki heç bir "Dağlıq Qarabağ xalqı" yoxdur və olmayıb: olan Azərbaycanın Qarabağ iqtisadi zonasının şimalında məskunlaşmış ermənilərdir. On minlərlə erməninin də hələ də Azərbaycan ərazisində yaşaması rəsmi Bakının yürütdyü tolerantlıq və multikulturalizm siyasətinin təzahürü sayılmalıdır.

Halbuki Ermənistanda, qədim Azərbaycan ərazilərində indi bir nəfər də soydaşımız qalmayıb. Etnik təmizləmə, kütləvi təqiblər və soyqırım siyasəti yürüdən Ermənistan yüz minlərlə azərbaycanlını tarixi torpaqlarından qaçqın salaraq monoetnik dövlətə çevrilib.

Elə sadəcə bu səbəbdən Ermənistanın ölkəmizdən nə isə tələb etməyə heç bir hüququ yoxdur.

Bundan başqa, 44 günlük Vətən Müharibəsi ərəfəsində də rəsmi Bakı qarabağlı ermənilərin Azərbaycanda yaşamlarını davam etdirmələrinin yollarının müzakirəsi üçün İrəvana dəfələrlə müraciət etmişdi.

Aldığımız cavab Paşinyanın "Qarabağ Ermənistandır və nöqtə!" bəyanatı olmuşdu.

Nikol Paşinyanın bitmək bilməyən absurd açıqlamaları, aqressiv ritorikası və danışıqlar prosesini dayandırmaq istəyi 44 günlük müharibəni qaçılmaz etdi.

"Qarabağın statusu" ifadəsi tarixə qovuşub. Bu söz birləşməsi nə 2020-ci ilin noyabrın 10-da imzalanmış üçtərəfli bəyanatda, nə də ötən ilin oktyabrında Praqada və Soçidə keçirilmiş görüşlərin sənədlərində yoxdur.

Tam əksinə, Ermənistan rəsmən bəyan edib ki, 1991-ci ildə imzalanmı Almata bəyannaməsinə uyğun olaraq İrəvanla Bakı bir birlərinin suverenliyini və ərazi bütövlüyünü qarşılıqlı şəkildə tanıyırlar.

Yəni Ermənistan etiraf edib ki, Qarabağ iqtisadi zonası Azərbaycanın tərkib və ayrılmaz hissəsidir.

İndisə Nikol Paşinyan 44 günlük Vətən Müharibəsinin sonuclarını, üçtərəfli bəyanatı, Praqa və Soçi görüşlərindəki razılaşmaları unudaraq sərt ritorikaya əl atıb.

Bu isə qəsdən və bilərəkdən edilən təxribat, Nikol Paşinyanın yekun sülh sazişinə yox, yeni hərbi əməliyyata hazırolaşması deməkdir.

Vəziyyət daha da gərginləşərsə və Azərbaycan da RSK-nın nəzarət altındakı ərazilərdə qarabağlı ermənilərin terror dəstələrinə, silahlı birləşmələrinə qarşı antiterror əməliyyatına başlayarsa, məsuliyyət bütünlüklə Ermənistanın, xüsusilə də bu ölkənin baş naziri Nikol Paşinyanın üzərinə düşəcək.

Rəsmi İrəvanın indi bel bağladığı və çox ümid etdiyi "hami"ləri isə həmişə olduğu kimi, vəziyyət mürəkkəbləşən kimi erməniləri meydanda qoyub gedəcəklər.

Onda Ermənistanın vəziyyəti fəlakətli olacaq.

Elçin Alıoğlu
TREND

 

 

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.