Siyasət

Ukrayna Rusiyanı MƏHV ETMƏYƏ HAZIRLAŞIR - Bəs hücum niyə gecikir? - SƏBƏB...

25 Yanvar 2023 11:44
Baxış: 4 437

Bir ay sonra Rusiya-Ukrayna müharibəsinin davam etməsinin artıq 1 ili tamam olacaq. Bu müharibədən öncə nə Kremlin verdiyi "4-5 günə müharibənin taleyini həll edəcəyik" proqnozları özünü doğrultdu, nə də Ukraynanın savaşın başlayacağı təqdirdə NATO-nun müdaxiləsi ilə bağlı gözləntiləri. Doğrudur, bu gün Qərb və ABŞ Ukraynanı artıq bir ildir ki, ən son hərbi texnika ilə təchiz etməkdə davam edir.

Hətta ABŞ hərbi sənayesi demək olar ki, tamamilə Ukrayna-Rusiya müharibəsinə fokuslanıb. Amma görünən odur ki, istər Kollektiv Qərb, istərsə də Vaşinqton münaqişənin tez bir zamanda birməsində maraqlı deyil. Bunu Volodimir Zelenskinin Ukraynanın hava məkanını tamamilə nəzarətə götürmək üçün aylardır etdiyi çağırışları Qərbdə bir o qədər ciddiyə almamaq, Kiyevə edilən hərbi dəstəyin aram-aram davam etməsi fonunda son günlər Rusiyanın yenidən fəallaşmasından anlamaq elə də çətin deyil. 

Bəs mütəxəssislər nə düşünürlər? Bu suala cavab tapmaq üçün Milli.Az yerli və əcnəbi hərbi, siyasi analitiklərin fikrini öyrənib.

Gürcüstan Strateji Araşdırmalar Mərkəzinin rəhbəri Qela Vasadze müharibənin hazırki vəziyyəti və gələcək gözləntiləri ilə bağlı deyib:

"Moskvanın hərbi əməliyyatları uzatmaqdan başqa xüsusi bir seçimi yoxdur. Rusiya havadan müdafiəni gücləndirmək və səfərbərlik fəaliyyətini elə təşkil etmək istəyir ki, faktiki limitsiz insan resurslarını xərcləməklə Rusiyanın hərbi məğlubiyyətini maksimum gecikdirsin. Çünki Kremlin təcrid şəraitində əsaslı yeni ekosistem yaratmaq üçün zamana ehtiyacı var.

İnstitusional olaraq Rusiya Federasiyasının bunun üçün əlində hər cür imkan cəmlənib:

1. Rusiya aparıcı rol oynadığı beynəlxalq formatlardan - Avrasiya İqtisadi Birliyindən (EAEU), KTMT-dən (Kollektiv Təhlükəsizlik Müqaviləsi Təşkilatı), MDB-dən istifadə edir 

2. Postsovetin hakim elitaları üçün sanksiyalardan yan keçmək sistemində korrupsiya komponentinin xarici və daxili destabilizasiya təhdidlərini artırmaq

3. Üsyankar dövlətlərlə hərbi ittifaqa qədər fəal əməkdaşlıq, mövcud vəziyyətdən yararlanmağa hazır olan ölkələrə ucuz xammal satmaq sisteminin yaradılması". 

Azərbaycan Hərbi Hava Qüvvələrinin pilotu, hərbi ekspert Aqil Rüstəmzadə isə Rusiyanın Ukrayna cəbhəsində son günlər xüsusilə fəallaşmasını belə izah edib:

"İstənilən, hətta ən yeni silah sistemi də hərbi personalın peşəkar və inteqrasiya olunmuş iştirakını tələb edir. Ən yaxşı artilleriya sistemləri və çoxsaylı reaktiv yaylım atəşi sistemləri ilə silahlanmış Ukrayna ordusu yüksək effektiv şəkildə hazırlıqlı batareyaya qarşı döyüşə bilmədi. Əməliyyatların planlaşdırılmasında və döyüş əməliyyatlarının aparılmasında müəyyən çətinliklər daha yüksək səviyyəli briqada və qərargah komandirləri səviyyəsində də müşahidə olunur.

Ümumilikdə bütün problemləri nəzərə alaraq, Ukrayna ordusunun hücumunun gecikdirilməsi ilə bağlı Qərbin yanaşmasını düzgün hesab edirəm. Hücumun gecikdirilməsinin məqsədlərindən biri NATO standartlarına uyğun silahlanmış və təlim keçmiş üç ordu korpusunun formalaşdırılmasıdır".

Təhməz Əsədov
Milli.Az

 

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.