Rusiya bu dövlətlərlə "BİRLƏŞİR" - Kremlin GİZLİ PLANI

"Böyük yeddilər"in (G7 - ABŞ, Böyük Britaniya, Kanada, Almaniya, İtaliya, Fransa və Yaponiya) ötən həftə Almaniyada gerçəkləşən toplantısında əsas müzakirə mövzusu Rusiya idi. "Böyük yeddilər" Rusiyaya qarşı sanksiyaların sərtləşməsi barədə fikir mübadiləsi apardılar. Ancaq hələ ki Qərb dövlətlərin ortaq qərarları Rusiyanı durdurmur". 

Bunu Milli.Az-a açıqlamasında "Atlas" Araşdırmalar Mərkəzinin rəhbəri Elxan Şahinoğlu deyib.

O bildirib ki, Kreml ABŞ əleyhinə çoxqütblü dünya formalaşdırmağa çalışır:

"G7 dövlətləri Rusiya ilə Çin arasında tərəfdaşlıq münasibətlərindən də narahatdırlar. Təsadüfi deyil ki, "böyük yeddilər" Pekinin Kreml siyasətinə təsir etməsini istəyiblər. "Böyük yeddilərin" məntiqinə görə, Pekin Rusiyanın Ukraynaya qarşı işğalçı müharibəsini durdurmaq üçün Kremlə təzyiq etməlidir. Bunun reallaşması mümkün deyil. Əksinə, Pekin Rusiya-Ukrayna müharibəsinə görə Qərbi ittiham etməkdə maraqlıdır. 

"Böyük yeddilər" bir tərəfdən Pekini yola gətirməyə çalışır, digər tərəfdən NATO-nun yeni konsepsiyasında Çin təhlükələrdən biri kimi dəyərləndirilib. Pekin NATO-nun bu dəyərləndirməsini təxribatçı adlandırıb. Pekin hesab edir ki, NATO "soyuq müharibə" dövründəki baxışlarını davam etdirir. Pekin NATO-nun Avropanı qarışdırdığını, indi isə hədəf kimi Asiya qitəsini seçdiyini bildirib. 

Bu arada, Kreml "böyük yeddilərə" qarşı BRİKS-in (Braziliya, Rusiya, Hindistan, Çin və Cənubi Afrika) sıralarını genişlədirməyə qərar verib. Rusiyanın xarici işlər naziri Sergey Lavrov artıq genişlənmə prosesinə start verildiyini bildirib. Lavrov növbəti iki ölkənin adını da çəkib: "Argentina və İran layiqli namizədlərdir". İran BRİKS-ə üzv olmaq üçün müraciət göndərib. Argentinanın da Braziliyanın ardınca təşkilata qoşulmaq istəyi var.  

Rusiyanın məqsədi aydındır. Kreml BRİKS-i genişləndirmək yolu ilə ətrafında Qərbə qarşı siyasi blok formalaşdırmağa çalışır. BRİKS ölkələri Rusiyanın Ukraynaya qarşı apardığı müharibəni dəstəkləmirlər. Buna baxmayaraq, BRİKS ölkələrinin Rusiya ilə əməkdaşlıqlarını davam etdirmələri və Kremllə təmaslarını davam etdirməsi də prezident Vladimir Putin üçün vacibdir. Kreml BRİKS və Şanxay Əməkdaşlıq Təşkilatı vasitəsilə ABŞ əleyhinə çoxqütblü dünya formalaşdırmağa çalışır". 

Təhməz Əsədov
Milli.Az