Kulinariya

Naxçıvanın adı və dadı ilə məşhur olan yeməyi - FOTO

7 Dekabr 2018 07:00
10 Şərh     Baxış: 4 035

Milli mətbəx nümunələrimiz xalqımızın qədim tarixi, yüksək mədəniyyəti ilə birbaşa bağlıdır. Bu baxımdan Naxçıvanın zəngin mətbəx nümunələri diqqəti cəlb edir. Həmin mətbəx nümunələrindən şıppır qovurmasını, arzuman küftəsini, kömbə kökəni, cəvizli kökəni, qədim şirniyyat növü olan əyirdəyi və digərlərini misal göstərmək olar. Naxçıvanda geniş yayılmış yemək növlərindən biri olan daş küftə isə bu gün doğma diyara qonaq gələn hər kəsin diqqətini cəlb edən dadlı yeməklərdəndir. Daş küftə Naxçıvanda, demək olar ki, hər bir ailənin müraciət etdiyi yemək növlərindən biridir.

Hazırlanmasında daşdan istifadə edildiyinə görə ona daş küftə deyirlər. Belə ki, bu yemək üçün ayrılmış ətin döyülməsində iri çaydaşı və cəviz ağacından hazırlanmış toxmaqdan istifadə olunub. Yastı formada, diametri, təxminən, 50-60 santimetr olan daşın bir üzü hamar olmalıdır. Bu, ona görədir ki, əti daşın üstündə toxmaqla rahat döymək olsun. Yastı daşın üz tərəfi böyük olmalıdır ki, döyülən ət və başqa qarışıqlar kənarlardan yerə tökülməsin.

Bu küftənin hazırlanma qaydası da maraqlıdır. Milli.Az bildirir ki, muxtar respublikanın Kəngərli rayonunun Yurdçu kəndindən olan Səkinə nənə AZƏRTAC-ın Naxçıvan bürosunun müxbiri ilə söhbətində deyir ki, bunun üçün əvvəlcə yağlı dana və ya qoyun əti seçilərək sümükdən ayrılır. Ətin miqdarı, adətən, ailə üzvlərinin sayına görə müəyyənləşdirilir. Sonra ət daşın üzərinə qoyularaq ağac toxmaqla döyülür. Ətin sonradan bura əlavə olunacaq qarışıqlarla tam döyülməsi bəzən bir saatdan da çox vaxt aparır.

"Elə ki, ət qiymə halına düşdü, o zaman üzərinə bir ovuc suda qaynadılmış noxud əlavə edib yenidən döyürük. Noxudlar tam əzilib, ətə qarışdıqdan sonra təmizlənmiş baş soğan və bir dəstə keşniş əlavə edirik. Daşın üstündə bunlar birlikdə döyüldükdən sonra, təxminən, bir stəkan düyü, sarıkök, duz-istiot və küftəyə xüsusi tam verən göyərti - nanə və məzrə əlavə edirik", - deyən Səkinə nənə bildirir ki, bütün əlavələr ətlə birgə tam döyülüb qurtardıqdan sonra yumurta ilə qarışdırılaraq kündələr hazırlanır. Bir ovucun içərisinə sığacaq böyüklükdə olan kündələrə zövqə görə bəzən zirinc və ya albalı, bəzən isə əvvəlcədən qaynadılmış yumurta qoyulur. Sonra ayrı bir qazanda yağla soğan qovurulur, üzərinə pomidor və ya tomat, sonra isə su əlavə edilərək qaynamağa qoyulur. Su qaynamağa başlayanda küftələr qazana boşaldılır. İstəyə görə yeməyin suyuna dilimlənmiş kartof və yaxud əvvəlcədən qaynadılmış noxud əlavə edilə bilər. Yemək hazır olduqdan sonra zövqə görə üzərinə quru nanə də tökülür.

Daş küftəsi, adətən, isti halda yeyilir. Maraqlısı odur ki, Şərur, Sədərək və Kəngərli rayonlarında bəzən onu soyuduqdan sonra səhər yeməyində, şirin çayla, lavaşın arasına bükərək də yeyirlər.

Qeyd etmək lazımdır ki, ətçəkən maşında hazırlanmış qiymə ətdən fərqli olaraq, daş küftəsi tərkibinə əlavə olunmuş qarışıqlarla birgə döyüldüyündən həm dadı ilə fərqlənir, həm də həzm baxımından digər ət yeməklərindən seçilir. Buna görə də keçmişdən bu günədək Naxçıvanın daş küftəsi süfrələrimizin bəzəyinə çevrilib.

Milli.Az

Məqaləyə dair fotomateriallar:

loading...

Şərh yaz:

10 Şərh:

  • Anonim
    ... · 7 Dekabr 08:4492

    Gozel Naxcivanimin metbexti

    Cavab yaz
  • Anonim
    Esmer · 7 Dekabr 09:0171

    Cox dadlı bir yemekdi ..en cox özel qonaqlar ucun hazırlayırlar ...

    Cavab yaz
  • Anonim
    Tural · 7 Dekabr 09:12712

    Bu naxcivanlilar her seyi terilemeyi xoslayirda. Menasiz bir seyi terifleyib dag basina qoyurlar.

    Cavab yaz
  • Anonim
    RF · 7 Dekabr 10:2830

    Döy ki , döyəsən, döyən qola qüvvət lazımdır

    Cavab yaz
  • Anonim
    $.$.$. · 7 Dekabr 10:4840

    Ərzuman kuftəsini ən cox bakılılar bişirir. Daş kuftəni də qiyməkeşlə qiymələyib bişirmək olar.Azərbaycanımızın butun bölgələrinin yeməkləri cox dadlıdır.

    Cavab yaz
  • Anonim
    eliw · 7 Dekabr 12:4130

    Qaynanamin sevimli yemeyi:)

    Cavab yaz
  • Anonim
    $.$.$. · 8 Dekabr 01:0020

    Gecə mətbəxdə iş görməyi sevənlər , biz iki bacı sevirik mətbəximizi. Nənəmizin köməkliyilə NAPALEON tortu bişirdik. Duzdur qat qat xəmirini anamız hazırlamışdı. biz yayıb , bişirdik və kremlədik . Sabaha qəşəng yumşalsın , kremini canına cəksin. Nənəmiz də gestapo kimi başımızın ustundə nəzarətci. Canım mənim , nənələrin ən gözəli, ən şirini !

    Cavab yaz
  • Anonim
    $.$.$. · 8 Dekabr 01:0720

    Tortumuzu hazır etdik. İndi də şabalıd təmizləməliyik.Anamız nənəmlə həmişə şabalıdı cərtib , yarı qaynadıb , duzlu , limonlu suda saxlayırlar.Və bu şabalıdları sudan cıxardıb dəsmal arasında qurulayıb , pinqvin kulyoklara hissə hissə yıqıb soyuducunun buzxanasında saxlayırıq. Hər dəfə plov bişirəndə qaraya qatırıq. Bu cur hazırlanmış şabalıd cox sərf edir. Marketlərdə cox bahadır təmizlənmiş, dondurulmuş şabalıdlar.

    Cavab yaz
    • Anonim
      $.$.$. · 8 Dekabr 11:2710

      Hərvaxtınız xeyir hörmətli şərhcilər. Hamınızı salamlayıram .Bacım mışıl mışıl yatır hələ. cox gec yatdıq, ucun yarısı işimizi bitirdik. Anamıza hərdən kömək edirik, dərslərimizdən vaxtımız cox məhdud , amma calışırıq kömək edək. Ev işləri cox cətin. Amma biz şənbə , bazar gunləri calışırıq anamıza kömək edək. Bəh bəh bəh ... Napaleon tortu cox dadlı olmuş. Yeriniz məlum. Kimin canı cəkirsə , qonaqımız ola bilər. Cayımı , tortumu nuş etdim , indi də kecim dərslərimə.

      Cavab yaz
  • Anonim
    $.$.$. · 8 Dekabr 13:4910

    Duz iki saatdır ki yazı yazırdım , şukur qurtardım. Tələbələrə zehin acıqlıqı arzulayıram. Gözəl , şirin ,şəkər gəlinlər , qızlar , coxdandır kulinariyada yıqışmırıq , milli mətbəximizin dadlı yeməklərinin reseptləri böluşmuruk. Bəlkə yenə yazasınız , təzə nəsə icad etdiyiniz yeməklərdən , şiniyyatlardan , salatlardan bizləri də xəbərdar edəsiniz . Mən cox xoşlayıram mətbəxdə nələrsə hazırlamaqı. Böluşsəniz , sevinərdim.Mən də nənəm və anamın hazırladıqı menyudan Sizlərə yazaram.

    Cavab yaz

XƏBƏR LENTİ

Copyright © 2015 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.