"Hünkar bəyəndi" resepti

"Loxum" kimi bişən ət, közlənmiş badımcanın hisli dadı və ipək kimi yumşaq "bəyəndi" (badımcan püresi) ilə birləşən bu xüsusi yemək Türk mətbəxinin ən sevilən əsas yeməklərindən biridir. Həm xüsusi ziyafətlərdə, həm də ailə süfrələrində şıq təqdimatı ilə seçilən "Hünkar bəyəndi" düzgün bişirmə texnikası ilə hazırlandıqda unudulmaz bir ləzzət təqdim edir.

Milli.Az lazım olan ərzaqları təqdim edir:

Ət qarışığı üçün:

600 qram dana əti (quşbaşı doğranmış)

2 xörək qaşığı zeytun yağı

1 ədəd böyük baş soğan

2 diş sarımsaq

2 ədəd rəndələnmiş pomidor

1 xörək qaşığı tomat pastası

1 stəkan isti su

Duz, istiot, qırmızı toz bibər (zövqə görə), yarım çay qaşığı kəklikotu

"Bəyəndi" üçün:

4 ədəd orta boy "bostan" badımcanı

2 xörək qaşığı kərə yağı

2 xörək qaşığı un

2 stəkan süd

1 stəkan rəndələnmiş kaşar pendiri

Duz və istiot

Üzəri üçün:

İncə doğranmış cəfəri

Hazırlanma qaydası
Badımcanları sobada və ya ocaqda qabıqları tamamilə qaralana qədər közləyin. Qabıqlarını soyub incə-incə doğrayın və artıq suyunu süzün.

Geniş bir qazanda zeytun yağını qızdırın. Ətləri əlavə edib yüksək odda suyunu salıb çəkənə qədər qovurun. Doğranmış soğan və sarımsağı əlavə edib bir neçə dəqiqə qovurun. Tomat pastasını qatın və qoxusu çıxana qədər qarışdırın.

Rəndələnmiş pomidorları, duz və ədviyyatları əlavə edin. İsti suyu töküb qazanın qapağını bağlayın və ətlər yumşalana qədər (təxminən 45-60 dəqiqə) zəif odda bişirin.

Ayrı bir qazanda kərə yağını əridib unu qoxusu çıxana qədər qovurun. Südü az-az əlavə edərək, çırpma teli ilə daim qarışdırın ki, qatı "beşamel" sousu alınsın.

Doğranmış köz badımcanları sousa əlavə edin. Duz, istiot və rəndələnmiş kaşar pendirini qatıb pendir tam əriyənə qədər qarışdırın.

Servis boşqabına əvvəlcə isti badımcan püresini (bəyəndini) yayın. Üzərinə bolca bişmiş ətli qarışığı yerləşdirin. Cəfəri səpərək isti şəkildə süfrəyə verin.

Badımcanları közləyərkən qabıqlarının yaxşı yanmasına imkan verin, bu, yeməyə əsl "hünkar" dadını verən hisli ətri qazandırır.

Közlənmiş badımcanın suyunu mütləq süzün ki, yeməyiniz sulu olmasın.

Südü sousa az-az tökərək daim qarışdırmaq sousun topaqlanmasının qarşısını alacaq.

Ətləri əvvəlcə yüksək odda "möhürləyib" (qızardıb), sonra zəif odda bişirmək ətin loxum kimi yumşaq olmasını təmin edir. Ət bərkdirsə, yalnız isti su əlavə edin, soyuq su ətin sərtləşməsinə səbəb olar.

Müəllif: Ülkər Vəliyeva (Milli.Az redaktor)