Xoş söz adı altında deyilən TƏHQİRLƏR

Psixoloqlar gündəlik ünsiyyətdə tez-tez işlədilən, zahirən xoş və mehriban səslənsə də, əslində insanın özünə inamını sarsıda bilən ifadələrə diqqət çəkiblər. Mütəxəssislərin sözlərinə görə, bu cür ifadələr zahirdə tərif kimi görünür, amma daxilində gizli şəkildə dəyərsizləşdirmə və ya incitmə mənası daşıyır.

Milli.Az xəbər verir ki, psixoloqların fikrincə, bu tip "xoş sözlər" çox vaxt insanın daxilində narahatlıq yaradır və xoşagəlməz təəssürat buraxır. Halbuki səmimi kompliment insanı ruhlandırmalı, sevindirməli, onda öz dəyərinə dair şübhə yaratmamalıdır.

Mütəxəssislərin fikrincə, aşağıdakı ifadələr ən çox rast gəlinən alt mənalı komplimentlər sırasındadır:

"Yaşına görə çox yaxşı görünürsən". Bu ifadə dolayısı ilə yaş artdıqca cazibədarlığın itməli olduğu fikrini ötürür.

"Düzü, bu qədər yaxşı alınacağını gözləmirdim". Tərif ilkin olaraq aşağı gözləntilərə əsaslanır.

"Sənin çox... özünəməxsus üslubun var". Çox vaxt heyranlıqdan daha çox tənqid və ya anlaşılmazlıq gizlədir.

"Sən düşündüyümdən daha ağıllısan". İlk təəssüratın mənfi olduğunu eyhamla bildirir.

"Sən makiyajsız daha yaxşı görünürsən". Digər hallarda insanın görünüşünü dolayı yolla dəyərsizləşdirir.

"Bunu geyinmək böyük cəsarət tələb edir". Seçimin qəribə və ya riskli olduğu mesajını verir.

"Mən sənin kimi yaşaya bilməzdim". İnsanı hamıdan fərqli kimi təqdim edir.

"Şəraiti nəzərə alsaq, pis öhdəsindən gəlmirsən". Diqqəti insanın gücündən çox çətinliklərə yönəldir.

"Yeni başlayan üçün kifayət qədər yaxşıdır". Tərif etsə də, dərhal aşağı səviyyəyə yerləşdirir.

"Canlıda fotolardakından daha yaxşı görünürsən". Şəkillərdə insanın pis göründüyünə dair gizli mesaj verir.

Ekspertlər vurğulayırlar ki, səmimi tərifdə şərt, müqayisə və ya gizli irad olmur. Əgər deyilən sözlərdən sonra insanda narahatlıq və daxili gərginlik yaranırsa, böyük ehtimalla bu, dəstək deyil, maskalanmış tənqiddir. /Lent.az

Milli.Az