Təkbaşına 65 soyuducu qədər enerji sərf edir

Elektrik sobaları anlıq enerji istehlakı baxımından ev təsərrüfatlarında ən yüksək yük yaradan cihazlardan biri hesab olunur.

Milli.Az xəbər verir ki, mütəxəssislər bildirir ki, bir elektrikli fırının işlədiyi anda sərf etdiyi güc, eyni vaxtda çalışan təxminən 65 soyuducunun ümumi enerji istehlakına bərabərdir. 

Elektrikli sobaların nominal gücü 2000-5000 vat arasında dəyişir. Müqayisə üçün, soyuducunun gücü adətən 300-800 vat aralığında olur. 

Mütəxəssislər yüksək sərfiyyatın səbəblərini də açıqlayır. Soyuducu yalnız mövcud soyuqluğu qorumaq üçün nisbətən az enerji tələb etdiyi halda, soba otaq temperaturunda olan bir sahəni qısa müddətdə 200°C və daha yüksək temperaturadək qızdırmaq üçün böyük güc sərf edir. Bu da onların enerji yükünü kəskin şəkildə artırır.

Enerji qənaəti üçün bir sıra praktiki metodlar tövsiyə olunur. Onlardan biri erkən söndürmə üsuludur: yeməyin bişməsinə 5-10 dəqiqə qalmış sobanı söndürərək içəridəki mövcud istilikdən istifadə etmək mümkündür. Həmçinin sobanın qapağının tez-tez açılmaması vacibdir, çünki hər açılış zamanı istilik itkisi baş verir və cihaz temperaturu yenidən qaldırmaq üçün əlavə enerji istifadə edir. İstiliyi yaxşı saxlayan qara rəngli, qalın divarlı və ağır bişirmə qabları da enerjiyə qənaətdə rol oynayır. Bundan başqa, bir neçə yeməyi eyni vaxtda bişirməklə sobanın təkrar-təkrar işə salınmasının qarşısını almaq olar.

Ekspertlər xəbərdarlıq edir ki, elektrikli sobadan intensiv istifadə olunan evlərdə aylıq elektrik xərcləri xeyli arta bilər. Bu cihazların yüksək enerji tələbi enerji böhranı dövrlərində şəbəkəyə əlavə yük salır və ümumi karbon izini artırır.

Mütəxəssislər bildirir ki, sobadan tez-tez istifadə edən ailələr toplu bişirmə və erkən söndürmə kimi üsullardan yararlanmaqla xərclərini nəzərəçarpacaq dərəcədə azalda bilər. Uzunmüddətli qənaət üçün isə enerji səmərəliliyi yüksək olan yeni nəsil elektrikli sobalara üstünlük verilməsi tövsiyə olunur.

Lalə Qüdrətova
Milli.Az