Ağzında rekord sayda diş AŞKARLANDI - FOTO

Malayziyada yaşayan Pratab Muniandi qeyri-adi anatomik xüsusiyyəti ilə diqqət mərkəzinə düşüb. Onun ağzında rekord sayda diş olduğu müəyyən edilib.

Milli.Az xarici mətbuata istinadən xəbər verir ki, Ginnesin Rekordlar Kitabına görə 33 yaşlı mühəndisin ağzında ümumilikdə 42 diş var. Bu isə orta hesabla insanda olan 32 dişdən 10 diş çoxdur və ona kişilər arasında ən çox dişə sahib şəxs kimi dünya rekordu qazandırıb.

Neft və qaz sənayesində çalışan Muniandi uzun müddət bu xüsusiyyətindən xəbərsiz olduğunu deyir. Onun sözlərinə görə, əlavə dişləri ilk dəfə 2021-ci ildə ailəsi ilə çay süfrəsi arxasında olarkən zarafat zamanı diqqət çəkib. Ailə üzvləri birlikdə dişlərini sayanda əvvəlcə 38 diş olduğunu müəyyən ediblər.

Daha sonra aparılan rentgen müayinəsi çənədə hələ çıxmamış daha dörd dişin olduğunu üzə çıxarıb. 2023-cü ilin əvvəlində stomatoloji yoxlamadan sonra onun ümumi diş sayının rəsmi olaraq 42 olduğu təsdiqlənib. Həkimlərin sözlərinə görə, bu dişlərin əksəriyyəti normal şəkildə inkişaf edir və ciddi problem yaratmır.

Rekord sahibi bildirir ki, əksər insanlar bu xüsusiyyəti o deməyincə fərq etmir. Onun sözlərinə görə, insanlar 32 dişdən xeyli çox dişə sahib olduğunu eşidəndə adətən buna inanmaqda çətinlik çəkirlər.

Muniandi əlavə dişlərin gündəlik həyatında heç bir narahatlıq yaratmadığını deyir. O, ağız sağlamlığına xüsusi diqqət yetirdiyini, gündə iki dəfə dişlərini fırçaladığını və müntəzəm olaraq diş ipindən istifadə etdiyini də qeyd edib.

O, rekordunu xüsusi və maraqlı təcrübə kimi qiymətləndirərək, diş sağlamlığının qorunmasında ona dəstək göstərən stomatoloqlara təşəkkürünü bildirib.

Qeyd edək ki, qadınlar arasında ən çox diş rekordunun sahibi Hindistan vətəndaşı Kalpani Balandır. Onun ağzında 38 diş olduğu qeydə alınıb.

Musa
Milli.Az