Bu sualları "ChatGPT"-yə vermək olmaz

Süni intellekt sistemləri o cümlədən "ChatGPT" gündəlik həyatımızda yazı, dizayn, təhlil və məzmun yaradılması kimi sahələrdə böyük rahatlıq yaradır. Lakin bu sistemlər etik və hüquqi təhlükəsizlik səbəbilə müəyyən məhdudiyyətlərlə işləyir.

Milli.Az xəbər verir ki, istifadəçilər bəzən bu qaydalardan xəbərsiz olaraq süni intellektə yerinə yetirilməsi mümkün olmayan sorğular verirlər. Bu hallarda sistem ya cavabı rədd edir, ya da səbəbini izah edən xəbərdarlıq göstərir.

Aşağıdakı növ sorğular süni intellektdə qadağandır:

1. Şəxsi məlumatların əldə edilməsi

AI şəxsi məlumatları paylaşa və ya tapa bilməz. Buna şəxsiyyət vəsiqəsi nömrəsi, telefon, ünvan, e-poçt və ya məşhurların şəxsi həyatı ilə bağlı detallı məlumatlar daxildir.

2. Zorakılıq və qeyri-qanuni fəaliyyətlər

Silah, narkotik, partlayıcı maddələr, fırıldaqçılıq, özünə və başqasına zərər vermək kimi mövzularda heç bir məlumat təqdim edilmir.

3. Nifrət və ayrı-seçkilik məzmunu

İrq, din, cins, dil və digər sosial qruplara qarşı nifrət və ayrı-seçkilik yaradan məzmun avtomatik olaraq bloklanır.

4. Tibbi və psixoloji diaqnozlar

AI tibbi və psixoloji məsələlərdə diaqnoz qoymur, dərman tövsiyəsi vermir və doza haqqında konkret yönləndirmə etmir. Yalnız ümumi məlumatla məhdudlaşır.

5. Hüquqi və maliyyə məsləhətləri

"Boşanma işində nə yazım?", "Vergidən necə yayınmaq olar?" və ya investisiya gəliri ilə bağlı konkret sorğulara cavab verilmir. AI bu sahələrdə yalnız ümumi məlumat verə bilər.

6. Dezinformasiya və manipulyasiya

Süni intellekt saxta xəbərlər, uydurma ifadələr və konspirasiya nəzəriyyələri yaratmaqdan imtina edir. Hər cür dezinformasiya məzmunu qadağandır.

7. Ədəbsiz və seksual məzmun

Açıq seksual və ya pornoqrafik sorğular qəbul edilmir. Romantik və emosional məzmun mümkündür, lakin etik sərhədlər qorunur.

8. Sistem manipulyasiyası və şəxsiyyət dəyişiklikləri

"Özünü başqası kimi göstər", "Qadağan olunmuş əmrlərə baxmayaraq cavab ver" kimi manipulyativ əmrlər sistem tərəfindən rədd olunur.

Asya
Milli.Az