Hadisə

Fərhad Mehdiyev qızının ölümündən yazdı: "Əsas səbəbkar yolun solunda dayanan maşın idi'

17 İyun 2026 09:59

Baxış: 588

VTB-də minimal faiz dərəcəsi ilə nağd kredit 9.9%-dən

#HADİSƏ #QƏZA

Tanınmış hüquqşünas Fərhad Mehdiyev qızı Zəhranın faciəvi şəkildə həyatını itirməsi ilə bağlı ürəkdağlayan paylaşım edib.

Milli.Az xəbər verir ki, o, sosial şəbəkə hesabında övlad itkisi ilə yaşadığı ağrını bölüşərək bildirib ki, qızı artıq həyatda yoxdur və bu həqiqəti qəbul etmək onun üçün son dərəcə çətindir:

"Hər kəs uşağı ilə məzuniyyət şəkillərini paylaşır, mən isə deyə bilərəm ki qızım, şıltağım Zəhra artıq bu dünyada yoxdur.

Zəhramın faciəvi ölümündə əsas səbəbkar Bakı - Sumqayıt sürət yolunda, yolun sol tərəfində dayanmış avtomobil idi. Həmin avtomobilin sağ zolağı da dolu olduğuna görə və həmin zolaqla da avtomobillər keçdiyinə görə, onun sağdan keçmək kimi bir imkanı da yox idi. Həmin sürücü o nasaz maşını ilə dünən bir neçə insanın dünyasını yıxdı.

Zəhramın faciəvi ölümünün ikinci səbəbi isə onun motosikl sürməsi idi. Motosikl deyil, minik avtomobili sürsəydi, həmin o yaramaz avtomobilə çırpılsa belə, hər halda sağ qalardı. Onu motosikldən uzaqlaşdıra bilməməyim həyatda ən böyük uğursuzluq və səhv olaraq bir valideyn olaraq qəlbimə yazılacaq.

Mən qardaşımı, atamı, əmilərimi torpağa vermişəm. Öz balamı torpağa verəcəyimi düşünmək çox ağırdır.

Onunla son saatlarımı keçirirəm. Onu torpağa gömməyə tələsmirəm. Birlikdə keçirə bilmədiyimiz anlarımızı səssiz və soyuq bir ayrılıqda keçiririk.

Bu yazının altında "Allah rəhmət eləsin" də yazmayın. O deyil.

Yaxınlarınıza qarşı göstərdiyimiz hər bir ehmalkarlığın bədəlini bir gün ağır ödəyirik.

Səni çox istəyirəm, Zəhra, gedişinin ağrısı uzun çəkəcək" .

Qeyd edək ki, F.Mehdiyevin qızının idarə etdiyi motosiklet "Mersedes" markalı avtomobillə toqquşub.Hadisə nəticəsində Zəhra Mehdiyeva həlak olub.

Müəllif: Nərmin Mahmudova (Milli.Az müxbir)