İdeal yuxu vaxtına diqqət edin

Mütəxəssislər bildirirlər ki, keyfiyyətli və kifayət qədər yuxu sağlam həyatın əsas şərtlərindən biridir.

Milli.Az xəbər verir ki, böyüklər üçün gündə orta hesabla 7-9 saat yuxu tövsiyə olunur. Yuxu zamanı orqanizm bərpa olunur, beyin dincəlir və immun sistemi güclənir.

Qeyri-kafi yuxu isə yorğunluq, diqqət dağınıqlığı, stress, əsəbilik və hətta ürək-damar problemləri riskini artıra bilər. Davamlı yuxusuzluq həm fiziki, həm də psixoloji sağlamlığa mənfi təsir göstərir.

Həkimlər hər gün eyni saatda yatıb oyanmağı, yatmazdan əvvəl telefondan uzaq durmağı və rahat yuxu mühiti yaratmağı məsləhət görürlər.

Kifayət qədər yatmaq sağlamlıq üçün nə qədər vacibdirsə, normadan artıq yatmaq da bir o qədər zərərli ola bilər. ABŞ-ın Kolumbiya Universitetinin apardığı və "Nature" jurnalında yayımlanan yeni araşdırmada sağlamlıq üçün "qızıl yuxu intervalı" müəyyən edilib.

Təxminən 500 min könüllünün iştirak etdiyi araşdırmada hər bir orqanın hansı sürətlə yaşlandığı ölçülüb. Nəticələr göstərib ki, həm az, həm də həddindən artıq yuxu beyin, ürək və immun sistemi daxil olmaqla, demək olar ki, bütün orqanizmin daha sürətli qocalmasına səbəb olur.

Araşdırmaya əsasən, 6-7 saat arası keyfiyyətli yuxu ən ideal müddət hesab olunur. Mütəxəssislər yaxşı yuxu üçün yataq otağının sərin, səssiz və qaranlıq olmasının vacibliyini vurğulayıblar. Həmçinin telefon istifadəsinin gec saatlarda dayandırılması tövsiyə edilir.

Araşdırmada qadınların kişilərlə müqayisədə gecə orta hesabla 15 dəqiqə daha çox yatmalı olduğu qeyd olunub. Alimlər bu fərqin hormonal və fizioloji səbəblərlə əlaqəli olduğunu bildiriblər.

Kifayət qədər yuxunun qadınlarda hormon balansına müsbət təsir etdiyi və onların gün ərzində özlərini daha xoşbəxt hiss etdikləri müəyyən olunub. Bəzi araşdırmalar isə yuxunun depressiyaya qarşı qoruyucu təsir göstərdiyini ortaya qoyub./axsam.az

Milli.Az