Bu avtomobillər bahalaşacaq

Amerika hərraclarında satılan Alman və Yapon avtomobilləri bahalaşacaq.

Milli.Az xəbər verir ki, bu birbaşa ABŞ-nin yeni prezidenti Donald Trampın qərarları ilə bağlıdır.

Tramp istəyir ki, yerli avtomobillər ( "Ford", "Chevrolet", "Jeep", "Tesla" və s. ) daha çox alınsın. Bu səbəbdən də tarifləri artırmaq qərarına gəlib. ABŞ hökumətinin artırılmış tarifləri, xüsusən də polad, alüminium və bəzi avtomobil hissələri və avtomobilləri üzərində tətbiq etdiyi yeni məhdudiyyətlər qlobal avtomobil sektoruna mənfi təsir göstərəcək.

Prezident Trampın tarif siyasətinin əsas məqsədi daxili avtomobil istehsalını canlandırmaqdır. Məqsəd avtomobil istehsalçılarını istehsalını ABŞ-yə köçürməyə təşviq edərək, istehsal obyektləri və digər sənaye fəaliyyətlərini ABŞ-yə cəlb etməkdir.

Bu siyasət çərçivəsində Tramp ABŞ-nin ən vacib üç ticarət tərəfdaşından idxallara 25%-lik tarif tətbiq edərək və Çin üzərindəki tarifləri 10%-dən 20%-ə qaldıraraq, sərbəst ticarətə məhdudiyyətlər qoyub.

Aydın məsələdir ki, avtomobil sənayesi qlobal təchizat əlaqələri üzərində fəaliyyət göstərir, yəni avtomobillərin istehsalında müxtəlif ölkələr arasında əməkdaşlıq mövcuddur. Avtomobillərin dizaynı bir ölkədə həyata keçirilir, komponentlər başqa ölkələrdə istehsal olunur və yığım isə üçüncü ölkədə baş verir.

Amerikada istehsal edən avtomobil istehsalçıları üçün Kanada kimi qonşu ölkələrdən gələn təchizatçılar olduqca vacibdir. Bu təchizatçılar ABŞ-də müxtəlif ştatlarda yerləşən istehsal məntəqələrində fəaliyyət göstərir. Hər bir avtomobil hissəsi sərhəd keçərək son montaja qədər bir neçə dəfə ölkələr arasında hərəkət edir. Məsələn, ABŞ, Kanada və Meksika arasında avtomobil hissələri davamlı olaraq sərhəddən keçir.

Yeni tariflər buna ciddi təsir edəcək, çünki hər bir hissə üçün əlavə vergi və gömrük rüsumu tətbiq ediləcək. Bu, avtomobil istehsalının xərclərini artıracaq və nəticədə istehsalçıların daha yüksək qiymətlərlə avtomobil istehsal etməsinə səbəb olacaq. Bu da avtomobil qiymətlərinin yüksəlməsinə və bazarda qeyri-müəyyənliyin artmasına yol açacaq.

Meksikada ABŞ bazarı üçün avtomobil istehsal edən Alman istehsalçıları böyük təzyiq altındadır. İstehsalın köçürülməsi, ehtimal ki, hər iki tərəfdə iş yerlərinin itirilməsinə səbəb olacaq. ABŞ tərəfindən tətbiq edilən daha yüksək tariflər, Meksikada ucuz əmək haqqı ilə istehsal üstünlüyünü aradan qaldıra və ya azalda bilər.

ABŞ-nin tarif siyasətinin təsiri auksionda alınan və digər ölkələrə göndərilən avtomobillərin qiymətlərinə də təsir edəcək. Artan tariflər və idxal xərcləri, xüsusən də avtomobillərin və onların hissələrinin qiymətlərini artıracaq. Bu da bahalaşmaya səbəb olacaq.

İslam
Milli.Az