Mədəniyyət

Milli İncəsənət Muzeyi “Teatrın gəncləri” layihəsinə start verildi - (Foto)

20 Noyabr 2026 14:20
Baxış: 119
VTB-də minimal faiz dərəcəsi ilə nağd kredit 9.9%-dən

Azərbaycan Milli İncəsənət Muzeyində Azərbaycan Dövlət Akademik Opera və Balet Teatrı ilə Azərbaycan Milli İncəsənət Muzeyi "Teatrın gəncləri" layihəsinə start verdi. Layihənin ilk tədbiri "Gənc vokal artistlərinin konserti" adlı musiqi gecəsi ilə baş tutdu. Gənc ifaçıların sənət potensialının nümayişi, onların yaradıcılıq imkanlarının genişləndirilməsi və səhnə fəaliyyətinə dəstək məqsədi daşıyan layihə ilk konserti ilə yadda qaldı.

Gecədə giriş sözü ilə çıxış edən Azərbaycan Dövlət Akademik Opera və Balet Teatrının direktor müavini Ramil Qasımov layihənin əhəmiyyətindən bəhs edərək, gənc sənətçilərin yaradıcılıq inkişafı, onların səhnə təcrübəsinin artırılması və sənət yolunda yeni imkanların əldə olunması baxımından bu təşəbbüsün xüsusi rolunu vurğuladı. O, layihənin gənc ifaçıların sənət dünyasına daha yaxından tanıdılması və istedadlarının geniş auditoriyaya təqdim olunması üçün mühüm platforma olacağını qeyd etdi.

Teatrın direktoru, Xalq artisti Yusif Eyvazovun gənclərə göstərdiyi diqqət və dəstəkdən bəhs edən Ramil Qasımov, gənc nəslin inkişafına qayğı ilə yanaşılmasının və onların yaradıcılıq fəaliyyətinin təşviq edilməsinin teatrın prioritet istiqamətlərindən biri olduğunu diqqətə çatdırdı. Ramil Qasımov çıxışında layihənin həyata keçirilməsinə göstərilən dəstəyə görə Azərbaycan Respublikasının Mədəniyyət Nazirliyinə və Azərbaycan Milli İncəsənət Muzeyinin rəhbərliyinə təşəkkürünü bildirərək, bu təşəbbüsün reallaşmasında onların töhfəsini xüsusi qeyd etdi.

Konsert proqramında teatrın gənc vokal artistləri Məhəmməd Şəmmədov, Günel Hacıyeva, Aynel Mehdiyeva, Emil İsmayılov, Rəşad Həsənzadə, Gülzar Hüseynova, Rəhman Əzizli, Nigar Cəfərova, Məleykə İsrəfilova, Zümrüd Davudova, Şəms Qəhrəmanova, Ruslan Persan və Elçin Əhədzadə çıxış etdilər.

Gecə boyunca ifaçıları pianoçular Tofiq Şıxıyev və Məryəm Məmmədova müşayiət edərək, musiqi nömrələrinin bədii ifadəsini və konsertin yüksək səviyyədə təqdim olunmasını təmin etdilər. Proqramda Azərbaycan və dünya klassik opera repertuarından seçilmiş əsərlər səsləndirildi. Gənc vokalçıların fərqli üslub və ifa xüsusiyyətlərini nümayiş etdirdiyi konsert musiqisevərlərə zəngin və rəngarəng proqram təqdim etdi.

İnformasiya dəstəyi - Trend.Az, Day.Az, Milli.Az

Məqaləyə dair fotomateriallar:

Azernews Newspaper

XƏBƏR LENTİ

Copyright © 2026 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.