Kinematoqrafçılar İttifaqında keçirilən seçkilər tamamilə qeyri-legitimdir - Rafiq Qəmbərov

SSRİ Dövlət Mükafatı laureatı, Azərbaycanın əməkdar incəsənət xadimi, tanınmış kinooperator və fotoqraf, Azərbaycan Kinematoqrafçılar İttifaqının idarə heyətinin üzvü Rafiq Qəmbərov Trend-ə müsahibəsində təşkilatda son dövrlər baş verən prosesləri kəskin tənqid edərək keçirilən seçkiləri qanunsuz adlandırıb.

Mayın 26-da keçirilən seçkilərin nəticələrinə əsasən, daha əvvəl AKİ-nin icraçı katibi vəzifəsində çalışmış Əli İsa Cabbarov təşkilatın yeni sədri seçilib. Seçkilərin nəticələri qanunvericiliyə uyğun qaydada baxılması və təsdiqlənməsi üçün Azərbaycan Ədliyyə Nazirliyinə təqdim olunacaq.

Rafiq Qəmbərovun sözlərinə görə, hazırda təşkilata AKİ-nin birinci katibi, SSRİ Dövlət Mükafatı laureatı, "Şöhrət", "Şərəf" və "İstiqlal" ordenləri ilə təltif olunmuş, milli incəsənətin inkişafına böyük töhfələr vermiş xalq artisti Şəfiqə Məmmədova rəhbərlik edir.

"Əgər təşkilatda hansısa dəyişikliklər planlaşdırılırsa, bunun üçün müəyyən qaydalar mövcuddur. Belə məsələlər kiçik bir qrup insanın fikri ilə həll oluna bilməz. Kimsə rəhbərliyin fəaliyyətini kifayət qədər səmərəli hesab etmirsə, İttifaqın ümumi qurultayı çağırılmalı və bütün məsələlər orada müzakirə edilməlidir", - deyə o vurğulayıb.

Qəmbərovun fikrincə, AKİ-nin sədri, Azərbaycanın xalq artisti Rasim Balayevin vəfatından sonra həm yaradıcılıq, həm də təşkilati-texniki məsələlərin müzakirə olunacağı tamhüquqlu qurultay keçirilməli idi.

"Belə məsələləri yalnız qurultay həll edə bilər. Təşkilat üzvlərinin kiçik bir qrupunun bu cür qərarları müstəqil şəkildə qəbul etmək hüququ yoxdur", - deyə o bildirib.

Keçirilən seçkilərin qanuniliyinə dair suala cavab verən Rafiq Qəmbərov bildirib:

"Mənim fikrimcə, onlar tamamilə qeyri-legitimdir. Bütün kinematoqrafçıların və yaradıcılıq ittifaqının üzvlərinin iştirakı ilə ümumi qurultay keçirilməli və ortaq qərara gəlinməlidir. Başqa yol yoxdur. Qərar kiçik bir qrup insanın istəyi ilə qəbul edilə bilməz".

Qəmbərov həmçinin qeyd edib ki, 1978-ci ildən Kinematoqrafçılar İttifaqının üzvüdür, təşkilatın idarə heyətində və Kinematoqrafçılar Gildiyasının idarə heyətində təmsil olunur.

"Mən ömrümün 50 ildən çoxunu kinoya həsr etmişəm. Bundan əlavə, 16 il parlamentdə baş müşavir vəzifəsində çalışmışam. Mən hər zaman qanuna əməl edən insan olmuşam və hesab edirəm ki, istənilən fəaliyyət yalnız qanunvericilik çərçivəsində həyata keçirilməlidir. Bu gün bəzi gənclərin etdikləri isə bu tələblərə uyğun deyil", - deyə o bildirib.

Onun sözlərinə görə, keçirilən tədbiri hüquqi qüvvəyə malik qurultay və ya görüş hesab etmək olmaz.

"Açığı, mən bu tədbiri necə adlandıracağımı belə bilmirəm. Sadəcə bir qrup insan toplaşıb və öz qərarlarını elan edib. Hüquqi baxımdan bunun heç bir əsası yoxdur. Bu, legitim proses hesab edilə bilməz", - deyə Rafiq Qəmbərov əlavə edib.

Milli.Az