78 yaşında vəfat edən Ramiz Quliyev kimdir? - FOTOlar

Xəbər verdiyimiz kimi,  bu gün Azərbaycanın xalq artisti, görkəmli tarzən Ramiz Quliyev vəfat edib. 

Milli.Az xalq artisti haqqında məlumatlar təqdim edir:

Ramiz Quliyev 1947-ci il aprelin 30-da Ağdamda qulluqçu ailəsində dünyaya gəlib. O, musiqiyə çox gənc yaşlarında maraq göstərib və 1954-cü ildə Ağdam şəhər 7 illik musiqi məktəbinə, daha sonra isə Üzeyir Hacıbəyov adına Ağdam orta ixtisas musiqi məktəbinə daxil olub.

1964-1969-cu illərdə Üzeyir Hacıbəyov adına Azərbaycan Dövlət Konservatoriyasında tar və dirijorluq ixtisasları üzrə təhsil alan Quliyev sənət yoluna "Şur" xalq çalğı alətləri ansamblında başlamış, gənc yaşlarından festivallarda, müsabiqələrdə Azərbaycan musiqisini təmsil etmişdir.

O, yarım əsrdən artıq fəaliyyəti ərzində Azərbaycanın ən tanınmış tar ifaçılarından biri kimi ad qazanıb. Ramiz Quliyev Türkiyə, ABŞ, Fransa, İngiltərə, İsrail, Norveç, Hindistan, Kanada, İran və daha bir çox ölkələrdə konsertlər verib, muğam sənətini və milli musiqimizi beynəlxalq səviyyədə tanıdıb.

Sənətkar həm də Üzeyir Hacıbəyli adına Bakı Musiqi Akademiyasında uzun illər müəllim kimi çalışıb, yüzlərlə tələbənin yetişməsinə töhfə verib. Onun yetirmələri bu gün ölkənin aparıcı musiqi kollektivlərində və xarici səhnələrdə fəaliyyət göstərirlər.

Ramiz Quliyev Azərbaycan mədəniyyətinə və muğam sənətinə verdiyi xidmətlərə görə müxtəlif orden və fəxri adlarla təltif olunub. O, öz dövrünün musiqi ənənələrini qoruyub saxlayan, eyni zamanda yenilikçi ifa üslubu ilə seçilən sənətkar kimi yadda qalıb.

Xalq artistinin ifasında yüzlərlə muğam, xalq mahnısı və bəstəkar əsəri lentə alınıb, müxtəlif ölkələrdə DVD və audio disklər şəklində yayımlanıb.

Ramiz Quliyevin vəfatı Azərbaycan musiqi mədəniyyəti üçün böyük itkidir. Onun sənəti və pedaqoji irsi gələcək nəsillər üçün örnək olaraq qalacaq.

Allah rəhmət eləsin!

Fidan
Milli.Az