Xalq artisti Hacıbaba Hüseynovun 105 illiyinə həsr olunan gecə təqdim edildi - FOTO

Beynəlxalq Muğam Mərkəzində "Nadir muğam ifaçıları" layihəsi çərçivəsində muğam sənətinin dərin bilicisi və sevilən xanəndə, Xalq artisti Hacıbaba Hüseynovun 105 illiyinə həsr olunan gecə təqdim edildi. 

Tədbirdə çıxış edən BMM-nin direktoru, Əməkdar artist Sahib Paşazadə mərkəzdə mütəmadi olaraq ustad xanəndələrin, muğam ifaçılarının xatirəsinə həsr olunan tədbirlərin keçirildiyini diqqətə çatdırdı. Hacıbaba Hüseynovun Azərbaycan muğam və qəzəl sənətinə verdiyi əvəzsiz töhfələrdən söz açdı. Bildirdi ki, Hacıbaba Hüseynovun yaratdığı çoxsaylı təsniflər musiqi irsinə daxil olmuş və muğam ifaçılığında geniş yayılmışdır. Hacıbaba Hüseynov xalq yaracılığına da böyük diqqət vermişdir. Azərbaycanın müxtəlif bölgələrindən, habelə Türkiyə və İraqda oxunan xalq yaradıcılıq nümunələrini təsniflərdə istifadə etmişdir, beləliklə, xalqdan topladığını yeniləmiş şəkildə xalqa qaytararaq, bu sənət əsərlərin daha da geniş tanınmasına zəmin yaratmışdır.

Gecədə çıxış edən Əməkdar incəsənət xadimi , xanəndə Aqil Məlikov, Əməkdar artist  Mirnazim Əsədullayev Hacıbaba Hüseynovla bağlı xatirələrini bölüşdülər, unudulmaz sənətkarın muğam sənətimizdə öz dəst-xətti olduğunu vurğuladılar. Bildirildi ki, xanəndənin sənəti, ədəbi yaradıcılığı, bəstələri, təsnifləri muğam sənətimiz var olduqca yaşayacaq. Azərbaycanın muğam məktəbinin təbliği və inkişafında Hacıbaba Hüseynovun özünəməxsus yeri var. Çıxışlar zamanı həmçinin Hacıbaba Hüseynovun muğam sənətimizdə pedaqoji fəaliyyəti ilə bağlı fikirlər söylənildi, sənətkarın təsnif və qəzəl yaradıcılığının özünəməxsusluğu qeyd olundu.
Xalq artisti Teyyub Aslanov, Əməkdar incəsənət xadimi Aqil Məlikov, BMM-nin solistləri Hüseyn Məlikov, Məmməd Nəcəfov, xanəndə Elbrus Niftəliyevin Hacıbaba Hüseynov repertuarından  rəngarəng ifaları tədbir iştirakçılarının  könlünü oxşadı. Xanəndələri tarzən Rövşən Qurbanovun rəhbərliyi ilə BMM- nin solistlərindən ibarət insrtumental heyət , Əməkdar artist Əliağa Sədiyevin rəhbərliyi ilə "Xarıbülbül" muğam qrupu və Əməkdar artist Emil Əfrasiyab müşayiət edirdi.

İnformasiya dəstəyi -  Trend.Az, Day.Az, Milli.Az