Şimali Afrika klassikası: Mərakeş üsulu limonlu və zeytunlu toyuq "Tajin"i

Mətbəxdə fərqli bir dad axtaranlar üçün Şimali Afrikadan əsl ziyafət! Mərakeşin məşhur konusşəkilli torpaq qablarında (Tajin) yavaş-yavaş bişən bu yemək; zəncəfil, sarıkök və darçının istiliyi ilə yaşıl zeytun və limonun yüngül turşməzə dadını bir qazanda birləşdirir.

Milli.Az lazım olan ərzaqları təqdim edir:
Toyuq: 6 ədəd toyuq budu (və ya iri doğranmış toyuq bud dibisi)

Soğan: 2 ədəd böyük boy quru soğan (yarım halqa şəklində doğranmış)

Zeytun: 1 stəkan çəyirdəksiz yaşıl zeytun (duzunu çıxarmaq üçün suda saxlanılmış)

Limon: 1 ədəd (nazik dilimlənmiş)

Sarımsaq: 3 diş əzilmiş sarımsaq

Göyərti: 1/4 dəstə xırda doğranmış təzə keşniş və ya cəfəri

Yağ: 4 yemək qaşığı zeytun yağı

Maye: 1 stəkan toyuq bulyonu və ya isti su

Tajin ədviyyat qarışığı:

Hərəsindən 1 çay qaşığı: toz zəncəfil, sarıkök, qara istiot

Yarım çay qaşığı: darçın və cirə

1 çay qaşığı duz

Hazırlanması:
Toyuqları geniş bir qaba alın, üzərinə əzilmiş sarımsağı və bütün ədviyyat qarışığını əlavə edib əlinizlə yaxşıca qarışdırın.

Geniş və qalın dibli bir qazanda zeytun yağını qızdırın. Toyuqları əlavə edib üzəri azca qızarana qədər hər iki tərəfini qızardın və qazandan çıxarın.

Həmin qazanda qalan yağın içərisinə doğranmış soğanları əlavə edin. Soğanlar tam yumşalıb karamel rəngi alana qədər (təxminən 10 dəqiqə) orta odda bişirin.

Qızartdığınız toyuqları soğanların üzərinə düzün. Toyuqların arasına yaşıl zeytunları və nazik dilimlənmiş limonları yerləşdirin.

Üzərinə isti toyuq suyunu gəzdirin. Qazanın qapağını sıx bağlayın. Qaynara düşdükdən sonra ocağın altını ən aşağı dərəcəyə qoyun. Toyuqlar sümükdən ayrılacaq qədər yumşalana qədər (təxminən 45-50 dəqiqə) yavaş odda bişirin.

Ocağı söndürməzdən 5 dəqiqə əvvəl üzərinə xırda doğranmış cəfəri və ya keşnişi səpin.

Bu yeməyi təzə çörəklə dadmaq daha ləzzətlidir. Nuş olsun!

Müəllif: Ülkər Vəliyeva (Milli.Az redaktor)