Rusiyada azərbaycanlı qadın keçmiş əri tərəfindən bıçaqlandı - Anbaan VİDEO

Rusiyanın "RİA Novosti" agentliyinin yaydığı video hər kəsi şoka salıb.

Milli.Az xəbər verir ki, görüntülər ölkənin Orenburq şəhərində qeydə alınıb. Belə ki, küçənin ortasında bir kişi keçmiş arvadına bıçaqla hücum edib. Qadını isə ölümdən oğlu xilas edib. O, çoxsaylı yaralarla xəstəxanaya yerləşdirilib. Videoda diqqət çəkən digər bir məqam hücuma məruz qalan qadının Azərbaycan dilində "olmayıb", "and içirəm" "Vallah olmayıb" ifadələrini işlətməsidir. Həmçinin hücum edən kişinin də azərbaycan dilində müxtəlif sözlər istifadə etdiyi eşidilir. 

Orenburq şəhərinin hüquq-mühafizə orqanlarının bildirdiyinə görə, qadına keçmiş əri hücum edib. Qadını onun əlindən 20 yaşlı oğlu xilas edib. O, anasını qarşılamaq üçün binanın həyətinə düşüb və qadının qışqırıq səslərini eşidib.

Artıq qadın xəstəxanaya yerləşdirilib, onda çoxsaylı yaraların olduğu bildirilir.

Hadisə barədə dərhal Orenburq şəhərinin polis şöbəsinin növbətçi hissəsinə məlumat verilib.

Qadını bıçaqlayan şəxs artıq polislər tərəfindən saxlanılıb. 47 yaşlı kişi əməlini etiraf edib, lakin bunun səbəbləri barədə danışmaqdan boyun qaçırıb.

Onu 10 ilə qədər azadlıqdan məhrumetmə cəzası gözləyir.

Hadisənin digər təfərrüatları barədə hələlik məlumat verilmir.

Milli.Az