Azərbaycanda 3 nəfərdən ibarət dəstə zərərsizləşdirilib - VİDEO - FOTO

Şəmkirdə dəfələrlə mal-qara oğurluğu edən dəstənin bundan sonrakı planları boşa çıxdı. Çünki polis 3 nəfərdən ibarət dəstəni zərərsizləşdirib.

Milli.Az Kəpəz TV-yə (Region TV) istinadən xəbər verir ki, Şəmkir Rayon Polis Şəbəsi əməkdaşlarının şikayət əsasında apardığı əməliyyat-axtarış tədbirləri nəticəsində rayon sakini Elxan Qurbanova məxsus fərdi təsərrüfatdan 2 baş iri buynuzlu mal-qara oğurlamaqda şübhəli bilinən Naxçıvan sakini 29 yaşlı Məhərrəm Həsənov və Daşkəsən rayon sakini 27 yaşlı Coşqun Mikayılov saxlanılıb. Aparılan araşdırmalar zamanı müəyyən edilib ki, bu, saxlanılan şəxslərin törətdiyi yeganə oğurluq hadisəsi deyil. Onlar bundan əvvəl də, yəni iyun ayının 18-də Göygöl sakini Şahin Rzayevlə əlbir olaraq rayonun Daşkəsənlə həmsərhəd Çaykənd kəndindəki fərdi təsərrüfatdan 4 baş iribuynuzlu mal-qara oğurlayıblar.

Pakizə Quliyeva Şəmkir Rayon Polis Şöbəsinin baş müstəntiqi:
"Müəyyən edilib ki, 3 şəxs Daşkəsən rayonundan Şəmkir çayını keçib, Şəmkir rayonuna daxil olublar. Burada vətəndaş Mahmud Qasımova məxsus fermadan 4 baş iribuynuzlu mal-qara oğurlayaraq birgə mal bazarında satıblar".

Saxlanılan şəxslər əməllərini etiraf ediblər. İlkin ifadə zamanı bildiriblər ki, məqsədləri bu yolla gəlir əldə etmək olub.

Məhərrəm Həsənov, saxlanılan şəxs: "Biz Könüllü kəndinə getdik. Ordan 2 baş mal-qara oğurlayıb aparanda polis yolda bizi saxladı".

Coşqun Mikayılov, saxlanilan şəxs:"Daşkəsən rayonu ərazisindən Şəmkirə kecdik. Ordan çətinliklə də olsa 4 bas mal-qaranı Bədrəyə apardıq. Əldə etdiyimiz pulu öz aramızda böldük".

Şahin Rzayev, saxlanılan şəxs: "4 bas mal-qaranı oğurladıq, hər birini 450 manata satdıq, maşın pulunu cıxandan sonra hərəmizə 320 manat pul düsdü".

Şəmkir polisi dəstənin başqa oğurluq hadisələri törədə biləcəyini də istisna etmir. Bununla bağlı araşdırmalar davam edir. Məlum faktlar üzrə isə cinayət işi açılıb.

Milli.Az